უკრაინა და ნიდერლანდები შეთანხმდნენ, რომ სამომავლოდ იარაღის ერთობლივ წარმოებას გაზრდიან.
ამის შესახებ უკრაინის პრეზიდენტმა, ვოლოდიმირ ზელენსკიმ ნიდერლანდების პრემიერ-მინისტრთან, რობ იეტენთან ერთად გამართულ პრესკონფერენციაზე განაცხადა.
პრესკონფერენციაზე ზელენსკიმ ნიდერლანდებთან ერთობლივი იარაღის წარმოების მნიშვნელობას გაუსვა ხაზი.
„ჩვენ ეს დავიწყეთ და აუცილებლად გავაგრძელებთ ამ ერთობლივ მუშაობას, ჩვენ ამას გავზრდით. კერძოდ, ეს გათვალისწინებულია ჩვენს სახელმწიფოებს შორის დღეს მიღებული ერთობლივი განცხადებით. შეხვედრაზე დეტალურად განვიხილეთ ეს საკითხები: ინვესტიციები, შესაძლო ლიცენზიები, წარმოების მოცულობა - ყველაფერი, რაც დღეს პრიორიტეტულია“, - თქვა ზელენსკიმ.
მიღებულ განცხადებაში ნათქვამია, რომ ორივე მხარემ დაადასტურა თავიანთი განზრახვა, გააფართოვონ თანამშრომლობა მათი ქვეყნების თავდაცვის ინდუსტრიებს შორის, კერძოდ, Build with Ukraine-ს ინიციატივის ფარგლებში ერთობლივი წარმოების პროექტების მეშვეობით.
„ორივე მხარემ ხაზი გაუსვა ერთობლივი წარმოების ინიციატივის წარმატებით განხორციელებისადმი ერთგულებას და ამ შედეგის მისაღწევად მუშაობენ“, - ნათქვამია განცხადებაში.
უკრაინის პრეზიდენტმა ასევე განაცხადა, რომ მან რობ იეტენს გადასცა უკრაინელი სამხედრო მოსამსახურეების მოთხოვნა ნიდერლანდებში წარმოებული რადარების შესახებ.
„ნიდერლანდები ერთ-ერთი ქვეყანაა, რომელიც საუკეთესო ასეთ რადარებს აწარმოებს და დღეს ჩვენ კონკრეტულად ეს მოთხოვნა განვიხილეთ“, - აღნიშნა ზელენსკიმ.
