ევროკომისარმა რეგიონული პოლიტიკის საკითხებში იოჰანეს ჰანმა და საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა ბრიუსელში ხელი მოაწერეს ერთობლივ დეკლარაციას რეგიონული პოლიტიკის საკითხებზე დიალოგის დაწყების თაობაზე.
საქართველოშიც და ევროკავშირშიც არსებობს რეგიონების არათანაბარ განვითარებასთან, ურბანიზაციასთან და სასოფლო და სხვა რეგიონების რესტრუქტურიზაციასთან დაკავშირებული გამოწვევები. დიალოგი გაიმართება "აღმოსავლეთის პარტნიორობის" კონტექსტში და ხელს შეუწყობს საცდელი პროექტებისა და პროგრამების განვითარებას. პირველ ნაბიჯად ევროკომისია ქართულ მხარეს სთავაზობს საინფორმაციო სემინარებსა და გაცვლით ვიზიტებს ქართველი ექსპერტებისთვის.
"დღევანდელი ერთობლივი დეკლარაცია ევროკავშირის მხრიდან საქართველოს მხარდაჭერის კიდევ ერთი დადასტურებაა. ჩვენ საქართველოს ევროკავშირის გამოცდილებას ვთავაზობთ, რომელიც საქართველოს განვითარების ხელშესაწყობად იქნება გამოყენებული. მივესალმებით საქართველოს რეგიონული განვითარების სახელმწიფო სტრატეგიას და ინტერესით ველით სამომავლო სამოქმედო გეგმას"- განაცხადა ევროკომისარმა ჰანმა.
შეგახსენებთ, რომ "აღმოსავლეთ პარტნიორობის" მიზანია ხელი შეუწყოს რეგიონულ განვითარებას მისი წევრებში. 2012 წელს საქართველოსთვის გამოიყოფა 2 მილიონი ევრო საცდელი პროგრამების განვითარებისთვის, ხოლო 2013 წელს 8.3 მილიონი ევრო - კონკრეტული პროექტების შესამუშავებლად. მიზანი არა საინვესტიციო პროექტების პირდაპირი მხარდაჭერაა, არამედ საქართველოს ეკონომიკური და ინსტიტუციონალური შესაძლებლობების გაძლიერება. ევროკავშირი მიესალმება საქართველოს რეგიონული განვითარების 2010-2017 წლების სახელმწიფო სტრატეგიასა და რეგიონული განვითარების საბჭოების შექმნის გადაწყვეტილებას. ევროკავშირს სჯერა ქვეყნის რეგიონული განვითარების გამჭვირვალე, თანამონაწილეობაზე დაფუძნებული პროგრამების პერსპექტიულობის და მხარს უჭერს დეცენტრალიზაციას.