"საქართველოს ინდუსტრიული ჯგუფი" (GIG) ამერიკელ პარტნიორებთან ერთად 25 მლნ აშშ დოლარად შეფასებულ პროექტს განახორციელებს.
საქმე ეხება ტყიბულის მაღაროების დეგაზიფიკაციის პროექტს, რომლის პრეზენტაცია GIG-მ ამერიკელ პარტიორებთან ერთად სასტუმროში "რედისონ ბლუ ივერია" 14 თებერვალს გამართა.
პროექტის განხორციელებაში ამერიკულ კორპორაციასთან Covalent International-ი და განახლებადი ენერგოტექნოლოგიების მწარმოებელ კომპანიასთან Advance Energy Resources-ი ერთად, აშშ-ის სამთავრობო უცხოური კერძო ინვესტიციების კორპორაცია (OPIC) მონაწილეობს.
როგორც GIG-ის ბიზნესის განვითარების დირექტორმა გიორგი ცანავამ ჟურნალისტებთან საუბრისას განაცხადა, პროექტის განხორციელება დაახლოებით 25 მლნ აშშ დოლარის ინვესტიციას საჭიროებს. "ფინანსური რესურსის მოზიდვის მიზნით, განაცხადით OPIC-ს უკვე მივმართეთ," - განმარტავს ცანავა.
პროექტის ბიზნეს-გეგმის პირველადი შესწავლის შემდეგ, ჯგუფმა OPIC-გან თანამშრომლობაზე თანახმობა უკვე მიიღო, მხარდაჭერის ოფიციალურ დადასტურებას კი GIG მიმდინარე წლის ივლისისთვის ელის.
დეგაზიფიკაციის შედეგად მოპოვებულ მეთანს GIG ენერგო კომპანიების შიდა უტილიზაციისთვის გამოიყენებს. "აღნიშნული პროექტის წარმატებით განხორციელება თანამედროვე ტექნოლოგიების დანერგვას გულისხმობს, რაც ტყიბულის მაღაროების უსაფრთხოების გაძლიერების თვალსაზრისით, კიდევ ერთი წინ გადადგმული ნაბიჯი იქნება," - განმარტავს ცანავა.
როგორც ტყიბულის მაღაროს მფლობელი კომპანიის "საქნახშირი" ტექნიკური დირექტორი ზაზა გორდეზიანი აცხადებს, შახტებში მეთანის გაზის გამოყოფა უსაფრთხოების პირველი ხელისშემშლელია და ამიტომ გადაწყდა ნახშირის ფენების წინასწარი დეგაზაცია. "ახალი ტექნოლოგიების დანერგვა შესაძლებლობას მოგვცემს შევამციროთ მეთანის გამოყოფა შახტის ატმოსფეროში, რაც გაზრდის უსაფრთხოებას. გარდა ამისა, იგი იძლევა ეკონომიკურ ეფექტს, კერძოდ, შესაძლებელი იქნება მისი ენერგოობიექტებში ნახშირთან ერთად გამოყენება. მისი ფიზიკურ-ეკონომიკური შესაძლებელობა ამ დროისთვის აზერბაიჯანიდან და რუსეთიდან იმპორტირებულ გაზს უტოლდება," - განმარტავს გორდეზიანი.
მისივე თქმით, ტყიბულის საბადოზე მარაგების მოცულობა 5 მლრდ კუბური მეტრია.
როგორც Covalent International-ის მმართველი დირექტორი ჯონ ონუფრაკი განმარტავს, პროექტზე მუშაობა აშშ-ის ვაჭრობისა და განვითარების სააგენტოსთან USTDA (United State Trade and Development Agency) ერთად წლიწადნახევრის წინათ დაიწყო. "აღნიშნული პროექტის ტექნიკურ-ეკონომიკური დასაბუთების დოკუმენტი უკვე არსებობს, ამჟამად მიმდინარეობს მუშაობა დეგაზიფიკაციის გეგმაზე. ამ თვალსაზრისით უსაფრთხოების სტანდარტები დიდი ხანია მოქმედებს, თუმცა საქართველოსთვის ეს სრულიად ახალი ტექნოლოგიაა და მისი დანერგვა უსაფრთხოების ზრდას შეუწყობს ხელს," - განმარტავს ონუფრაკი.
ტყიბულის მაღაროების დეგაზიფიკაციის შესაძლობლობების შესწავლის შესახებ GIG-ის ინიციატივის USTDA-მ 800 ათასი აშშ დოლარით დააფინანსა.
„საქართველოს ინდუსტრიული ჯგუფმა" 3 თებერვალს ასეულობით მილიონი ევროს ღირებულების 2 პროექტის განახორციელების დაწყების შესახებ განაცხადა. პროექტი ტყიბულში 300-მეგავატიანი, ქვანახშირზე მომუშავე თბოელექტროსადგურის მშენებლობასა და ქვანახშირის ახალი მაღაროების განვითარებას ითვალისიწნებს, რაზეც ჯგუფი 500 მლნ ევროს ინვესტიციას მოიზიდავს.
პროექტის ფარგლებში ტყიბულის მაღაროში ნახშირის მოპოვების მაჩვენებელი გაათმაგდება, დაინარგება ახალი ტექნოლოგიები და გაიზრდება უსაფრთხოება, პროექტების განხორციელების შედეგად დამატებით შეიქმნება ათასობით სამუშაო ადგილი.
ჰოლდინგური კომპანია „საქართველოს ინდუსტრიული ჯგუფი" 2006 წელს დაარსდა. GIG-ის უკვე განახორციელებული აქვს ათობით მილიონი დოლარის ინვესტიცია საქართველოს ეკონომიკაში. ჰოლდინგში გაერთიანებულია ენერგეტიკის, ბუნებრივი რესურსების მოპოვება-გადამუშავების, სამშენებლო მასალების წარმოების, ლოჯისტიკური მომსახურების, დეველოპმენტის, მედია-ბიზნესის და სხვა სფეროებში მოღვაწე კომპანიები.