„ქრისტიან-დემოკრატების" ლიდერები დღეს ნავთლუღის დასახლებაში გოგუების ექვსშვილიან ოჯახს ესტუმრნენ. ლევან ვეფხვაძემ ბუნებრივი აირის ტარიფს კაბალური უწოდა და განაცხადა, რომ „სოკართან" ხელშეკრულების 2020 წლამდე გაგრძელება დანაშაულია, რადგან ნაბუქოს პროექტის ამოქმედების შემდეგ, ტრანზიტის საფასურად, საქართველოს უფასოდ დარჩება გაზის ის რაოდენობა, რასაც მოსახლეობა მოიხმარს.
პარლამენტის ვიცე-სპიკერი აუცილებლად მიიჩნევს 2001 წელს, „შაჰდენიზთან" გაფორმებული კონტრაქტის ამოქმედებას, რაც ვეფხვაძის განმარტებით, ტარიფის მნიშვნელოვნად შემცირების საშუალებას იძლევა.
ინგა გრიგოლიას განცხადებით, საქართველოში არაადეკვატურად მაღალი კომუნალური ტარიფებია და ამას 20 ლარიანი ვაუჩერების დარიგება ოდნავადაც ვერ შველის.
გოგუების ოჯახს, სადაც დღეს „ქრისტიან-დემოკრატები" მივიდნენ, გადასახადის სიძვირის გამო, გაზი უკვე თვეებია გამორთული აქვს.
