ყატარელ ბიზნესმენებთან სასაუბროდ ეკონომიკისა და მდგრადი განვითარების მინისტრი ვერა ქობალია ყატარში გაემგზავრა. დოჰაში ვიზიტისას ქობალია "ყატარის ავიახაზების" ხელმძღვანელობასთან, პირდაპირი ავიარეისების დანიშვნის შესახებ ცალკეულ დეტალებს დააზუსტებს. სწორედ ვერა ქობალიაზე იქნება დამოკიდებული "ყატარის ავიახაზების" მენეჯმენტი დოჰა-თბილისის პირდაპირი ავიარეისების რენტაბელურობაში დაარწმუნოს.
ეკონომიკისა და მდგრადი განვითარების მინისტრთან ერთად ყატარში იმყოფება ერთიანი სატრანსპორტო ადმინისტრაციის ხელმძღვანელი ირაკლი დავითაძეც.
"ყატარის ავიახაზებმა" საქართველოს ბაზრის ათვისების სურვილი რამდენიმე თვის უკან გამოთქვა. კომპანიის 50 %-ს სახელმწიფო, ხოლო 50%-ს კერძო პირები ფლობენ. 2015 წლისთვის ავიაკომპანიას ავიაპარკის შევსება 110 თვითმფრინავამდე აქვს დაგეგმილი.
აღსანიშნავია, რომ "ყატარის ავიახაზების" გენერალურ დირექტორს აქბარ ალ-ბაკირს საქართველოს პრემიერ-მინისტრი ნიკა გილაური გასული წლის თებერვალში უკვე შეხვდა. გილაურის "ყატარის ავიახაზების" ხელმძღვანელთან შეხვედრისას საუბარი შეეხო პირდაპირი მიმოსვლის დაწყებას თბილისსა და დოჰას შორის, რამაც ხელი უნდა შეუწყოს ორი ქვეყნის მოსახლეობის მიმოსვლას და ბიზნესმენებს შორის კონტაქტების დამყარებას.
„ყატარის ავიახაზების" ხელმძღვანელმა საქართველოს პრემიერ-მინისტრთან საუბრისას აღნიშნა, რომ მისი კომპანია აუცილებლად დაამყარებს პირდაპირ ავიამიმოსვლას თბილისსა და დოჰას შორის, თუმცა ჯერ-ჯერობით ავიამიმოსვლის დაწყების თარიღი არ არის ცნობილი და ამის შესახებ დამატებითი მოლარაპარაკებები გაიმართება.
ეკონომიკისა და მდგრადი განვითარების სამინისტროს ინფორმაციით, ქართული დელეგაცია 16 თებერვალს დაბრუნდება.
შეგახსენებთ, რომ ქართულ ავიაბაზარზე შემოსვლას გეგმავს ასევე
არაბეთის გაერთიანებულ ემირატებს ავიაკომპანია " Fly Dubai".
