ახალი თაობის მაღალტექნოლოგიური ტელევიზიის SILK TV-ის დანერგვა კომპანია „სილქნეტმა" 2010 წლის სექტემბრიდან დაიწყო და 6 თვის განმავლობაში თბილისის მასშტაბით უკვე 6 000-ზე მეტ მომხმარებელს აწვდის სერვისს. ტელევიზია (IPTV) ინტერნეტ პროტოკოლზეა დაფუძნებული და მისი მიწოდება შესაძლებელია როგორც ოპტიკურ-ბოჭკოვანი ტექნოლოგიით, ისე დსლ-ქსელით. ბათუმი მეორე ქალაქია, სადაც კომპანია „სილქ ტივის" სერვისს დანერგავს.
სერვისის პრეზენტაცია გაიმართება ბათუმში, სასტუმრო „შერატონში" 2011 წლის 15 თებერვალს 18:00 საათზე. პროდუქტი წარდგენილი იქნება ფართო საზოგადოებისთვის: აჭარის მთავრობის, მერიის, საკრებულოს, ბიზნეს-ორგანიზაციებისთვის, სასტუმროებისთვის და მედიის წარმომადგენლებისთვის.
„სილქნეტი" ტელევიზიის მიწოდებას ბათუმში დაიწყებს ინტერნეტ აბონენტებისთვის დსლ-ტექნოლოგიით. მომხმარებლები 60 არხიანი პაკეტით ისარგებლებენ. პაკეტში შესულია ქართული და უცხოური საინფორმაციო, შემეცნებითი, კინო, საბავშვო და სპორტული არხები.
ეთერის მართვის შესაძლებლობა, რომელიც „სილქ-ტივის" გააჩნია, მომხმარებელს საშუალებას აძლევს სასურველი გადაცემა უკან დააბრუნოს, თავიდან ნახოს საინტერესო მონაკვეთი, შეაჩეროს გადაცემა და ხშირად ყურებადი არხების რჩეული დააკომპლექტოს. სწორედ ეს ფუნქციები განასხვავებს ინტერაქტიულ ტელევიზიას საკაბელო მაუწყებლობისგან.
სს „სილქნეტი" მსხვილი სატელეკომუნიკაციო კომპანიაა, რომელიც სამი კომპანიის ს.ს. „გაერთიანებული ტელეკომის", შ.პ.ს „ვანექსის" და შ.პ.ს „აჭარის ელექტროკავშირის" ბაზაზე დაფუძნდა. ფლობს ქვეყნის მასშტაბით სატელეკომუნიკაციო ინფრასტრუქტურას, ემსახურება 450 ათას მომხმარებელს სატელეფონო, ინტერნეტ და სატელევიზიო სერვისით.
აჭარის ტერიტორიაზე კომპანიის სერვისებით სარგებლობენ ბათუმის, ქობულეთის, ქედას, შუახევის აბონენტები.