გონჩარენკოს განცხადებების 99 პროცენტს არ ვეთანხმები, ისევე როგორც არაფერს ვიზიარებ შალვა პაპუაშვილის მოღალატეობრივი განცხადებებიდან, რომელსაც ყოველ დილით აკეთებს, – ამის შესახებ „ძლიერი საქართველო – ლელოს“ წევრმა, თაზო დათუნაშვილმა განაცხადა.
თაზო დათუნაშვილს შეკითხვა დაუსვეს შალვა პაპუაშვილის დღევანდელ ფეისბუქპოსტზე, რომელშიც ის აღნიშნავს, რომ „უკრაინაში ომის დაწყებიდან ორ დღეში გაჩნდა პირველი მოწოდება, საქართველოს რუსეთის წინააღმდეგ „მეორე ფრონტი“ გაეხსნა, სამხედრო კონფლიქტში ჩაბმულიყო, კიევიდან გაჟღერდა ცინიკური და პროვოკაციული მოწოდებები: „ქართველებო, მშვენიერი ამინდია, იქნებ გაისეირნოთ ცხინვალსა და სოხუმში“.
„გონჩარენკო არის ოდიოზური ფიგურა, შალვა პაპუაშვილის ანალოგი. როგორი ოდიოზური არარაობაც შალვა პაპუაშვილია, ამ ჟანრში და ლიგაში თამაშობს გონჩარენკო. ის ჩემი პოლიტიკური პარტნიორი არ არის. მისი განცხადებები მეც მომისმენია და 99 პროცენტს არ ვეთანხმები, არცერთ სიტყვას არ ვიზიარებ, ისევე როგორც არაფერს ვიზიარებ შალვა პაპუაშვილის მოღალატეობრივი განცხადებებიდან, რომელსაც ყოველ დილით აკეთებს. შალვა პაპუაშვილისნაირი ხალხის ადგილი ისტორიის სანაგვეზეა და, სულ მცირე, მოქმედ ციხეში, სადმე საქართველოში. ეს არის მტრის, რუსეთის სასარგებლოდ მოქმედი აგენტი“, – განაცხადა თაზო დათუნაშვილმა.
შეკითხვაზე, „გონჩარენკოს ფეისბუქპოსტს კარგი გამოხმაურებები მოჰყვა ქართული ოპოზიციისა და აქტივისტების მხრიდან. ადასტურებს თუ არა ეს, რომ ქვეყნის შიგნითაც რიგ აქტორებს საქართველოს ომში ჩართვა უნდოდათ?“, თაზო დათუნაშვილმა აღნიშნა:
„არა არ ადასტურებს. გონჩარენკოს მოწოდებებს ავხსნი იმით, რომ ის არის შალვა პაპუაშვილის მსგავსი ოდიოზური ფიგურა. შალვა პაპუაშვილი კიდევ არის გამოქვაბულიდან გამოქცეული მოღალატე. საქართველოში ომში ჩართვის საფრთხე არ დამდგარა. ზოგადად, საქართველოში რუსეთის მხრიდან ომის საფრთხე არსებობს იმ დღიდან, როდესაც ზვიად გამსახურდიამ საქართველოს პარლამენტის, მაშინდელი უზენაესი საბჭოს დარბაზში იყვირა: „გაუმარჯოს დამოუკიდებელ საქართველოს“. რუსები სულ გვეომებიან, დამპყრობელი, ნაძირალა ხალხია. ჯარი დგას თბილისიდან 40 კმ-ში, შესაბამისად, საფრთხე ყოველთვის არის და ამ საფრთხის განეიტრალება, პაპუაშვილისთვის, გამოქვაბულის ადამიანისათვის არის მუხლებზე დაცემა და პუტინის ფეხების კოცნა, ჩვენთვის არის საქართველოს უსაფრთხოების გარანტიების ძიება იმ ქვეყნებთან, რომლებიც ისტორიულად ჩვენნაირი ქვეყნებისთვის რუსეთის წინააღმდეგ ყოველთვის უსაფრთხოების გარანტს წარმოადგენდნენ“.
