14 თებერვალს 11 საათზე სასტუმროში "რედისონ ბლუ ივერია" საქართველოს ინდუსტრიული ჯგუფი" (GIG) ტყიბულის მაღაროების დეგაზიფიკაციის ტექნოლოგიის პრეზენტაციას უცხოელ პარტნიორებთან Covalent Energy და Green Gas ერთად გამართავს.
წელიწადნახევრის წინ აშშ-ის ვაჭრობისა და განვითარების სააგენტომ USTDA (United State Trade and Development Agency) ტყიბულის მაღაროების დეგაზიფიკაციის შესაძლობლობების შესასწავლად GIG-ის 800 ათასი აშშ დოლარი გამოუყო. ამერიკულმა კორპორპორაციამ Covalent Energy, რომელიც მაღაროების დეგაზიფიკაციის თანამედროვე ტექნოლოგიის მფლობელია, უკვე დაასრულა ტყიბულის ლანდშაფტის და მაღაროს ტექნიკური პარამეტრების შესწავლა.
ტყიბულის მაღაროების დეგაზიფიკაციის პროექტის განხორციელება რამდენიმე ათეული მილიონი აშშ დოლარის ინვესტიციას საჭიროებს. იაფი ფინანსური რესურსის მოსაზიდად GIG-იმ OPIC-ს განაცხადით უკვე მიმართა. პროექტის ბიზნეს გეგმის პირველადი შესწავლის შემდეგ OPIC-მა თანამშრომლობაზე თანახმობა განაცხადა, მხარდაჭერის ოფიციალურ დადასტურებას კორპორაციისგან GIG მიმდინარე წლის ივლისისთვის ელის.
დეგაზიფიკაციის შედეგად მოპოვებულ მეთანს GIG -ის ჯგუფში შემავალი ენერგოკომპანიები საკუთარი უტილიზაციისთვის გამოიყენებს. პროექტის განხორციელება ტყიბულის მაღაროების უსაფრთხოების გაძლიერების თვალსაზრისით, კიდევ ერთი წინგადადგმული ნაბიჯი იქნება, რის საშუალებასაც თანამედროვე ტექნოლოგიების დანერგვა იძლევა.
3 თებერვალს ჰოლდინგმა "საქართველოს ინდუსტრიული ჯგუფი" ორი ახალი პროექტის განხორციულების შესახებ განაცხადა, რომელთა ჯამური ღირებულება 700 მილიონ ევროს აღემატება. Gწლის ბოლომდე ტყიბულში 300 მეგავატიანი ქვანახშირზე მომუშავე თბოელექტროსადგურის მშენებლობა დაიწყება, რაც კომპანიას ახალი მაღაროების განვითარების შესაძლებლობას მისცემს.
შეგახსენებთ, რომ„საქართველოს ინდუსტრიული ჯგუფი" წარმოადგენს ყველაზე მსხვილ ჯგუფს, რომელიც დაარსდა 2006 წელს და უკვე განახორციელა ათობით მილიონის ინვესტირება საქართველოს ეკონომიკაში. ჰოლდინგი აერთიანებს და მართავს კომპანიებს ენერგეტიკის, ბუნებრივი რესურსების მოპოვება-დამუშავების, სამშენებლო მასალების წარმოების, ლოჯისტიკური მომსახურების, დეველოპმენტის, მედია-ბიზნესის და სხვა სფეროებში.
