სოხუმის უნივერსიტეტის ლიკვიდაციის პროცესი დაწყებულია, - ამის შესახებ სოხუმის სახელმწიფო უნივერსიტეტის პროფესორმა, ზურაბ პაპასკირმა განაცხადა.
მისი თქმით, საისტორიო სკოლაში, რომელსაც თავად ხელმძღვანელობს, კატასტროფული სიტუაციაა.
"ჩვენ ვართ დღესაც ფრონტის წინა ხაზზე, სოხუმის უნივერსიტეტის საისტორიო სკოლა, რომლის ლიდერიც ვარ მე, დღეს დგას წინა ხაზზე, მთლიანად იღებს კონტრპროპაგანდის დატვირთვას, საქართველოს ერთიანობის იდეის გატანას. დღეს მე სკოლას მისპობენ, კატასტროფული სიტუაციაა, ყველა პროგრამა ამ წუთებში დახურულია. სოხუმის უნივერსიტეტის ლიკვიდაციის პროცესი დაწყებულია. ისევ პედაგოგიური ინსტიტუტის ფორმატში გვაბრუნებენ, ეს არის კაპიტულაცია, ეს ვერ გააკეთა მოსკოვმა, საბჭოთა პერიოდის განმავლობაში. მთელ ისტორიას ანგრევენ, მთელ დევნილ საზოგადოებას სულში აფურთხებენ, ამის მოთმენას ჩვენ არ ვაპირებთ. პირდაპირ ვამბობთ, რომ როგორც სოხუმის უნივერსიტეტი გახდა პროტესტის ფლაგმანი, სოხუმში, 89 წელს, ისე შეიძლება დღესაც შეიძლება პროფესურა, სტუდენტებთან ერთად გახდეს ფლაგმანი, დევნილი საზოგადოებისთვის, - განუცხადა პაპასკირმა "ტვ პირველს".
