დღეს, 11 თებერვალს, გვიან საღამოს თბილისის ანძა ირანის ისლამური რესპუბლიკის დროშის ფერებში გაანათეს - 11 თებერვალს ირანი აღნიშნავს 1979 წლის ისლამური რევოლუციის 47-ე წლისთავს. ანძის ანთებაც ამ თარიღს უკავშირდება.
თბილისის მერია განმაარტავს, რომ ანძა ირანის საელჩოს მომართვის საფუძველზე განათდა, „რაც უკავშირდება ირანის ეროვნულ დღესასწაულს.
ირანის ელჩი საქართველოში, სეიედ ალი მოჯანი აცხადებს, რომ ანძა ირანის ფერებში „ირანსა და საქართველოს ისტორიული ურთიერთობებიდან და ორ ერს შორის არსებული კარგი ურთიერთობებიდან გამომდინარე განათდა“.
„ეს ნათელი სიმბოლოა იმისა, რომ დღევანდელი ირანის პატივისცემა ოფიციალურად და საერთაშორისო დონეზეა აღიარებული“, - წერს იგი პლატფორმა X-ზე.
ელჩის ცნობით, საქართველოს საგარეო საქმეთა მინისტრის მოადგილე, ლაშა დარსალია მონაწილეობდა „ირანის ისლამური რესპუბლიკის ეროვნული დღისადმი მიძღვნილ ცერემონიაზე“.
ალი მოჯანის სიტყვებით, დარსალიამ „ოფიციალურად მიულოცა ირანს ეს თარიღი და უწოდა მას ირანის ისტორიული გზის, ეროვნული იდენტობისა და განვითარების სიმბოლო“.
