სოფლის მეურნეობის მინისტრის ბაკურ კვეზერელის განმარტებით, სოფლის მეურნეობის დარგში ახალი პროექტების განხორციელება უახლოეს პერიოდში დაიწყება. მინისტრი ამბობს, რომ დარგის დივერსიფიკაციისათვის რამდენიმე პროექტი უკვე დაწყებულია კიდეც.
"იმ პროექტების ნაწილის განხორციელება, რომელიც საქართველოს პრეზიდენტმა თავის გამოსვლაში დაასახელა, უკვე დაწყებულია, ხოლო ნაწილიც მალე დაიწყება. პრეზიდენტმა თავის გამოსვლაში ახალი პროექტების შესახებაც გააჟღერა ინფორმაცია. ამ მიმართულებით მუშაობა დაწყებულია და წელს გარკვეული შედეგებიც გვექნება,"- განაცხადა ბაკურ კვეზერელმა.
შეგახსენებთ, რომ ენერგო ვაუჩერების შემდეგ სახელმწიფო სასურსათო ვაუჩერებსაც დაარიგებს. ამის შესახებ საქართველოს პრეზიდენტმა მიხეილ სააკაშვილმა საქართველოს პარლამენტის წინაშე წლიური საანგარიშო მოხსენებით გამოსვლისას განაცხადა.
მისი განმარტებით, სასურსათო ვაუჩერების დარიგება მარტიდან დაიწყება და ის 30-ლარიანი იქნება.
"მარტის თვიდან, საქართველოს ყველა ოჯახი, თავისი მუდმივი საცხოვრებელი ადგილის მიხედვით, იმავე პრინციპით, როგორც ენერგო ვაუჩერის შემთხვევაშია, 30-ლარიან სასურსათო ვაუჩერებს მიიღებს. ეს არის ფასიანი ქაღალდი, რომელიც შეგიძლიათ ბანკში გაანაღდოთ და ამის ნაცვლად აიღოთ პირდაპირ 30 ლარი", - განმარტა სააკაშვილმა.
ქვეყნის პირველი პირის თქმით, ენერგო უვაუჩერების მსგავსად, სასურსათო ვაუჩერების მფლობელებსაც საშუალება ექნებათ, სურვილის შემთხვევაში, ის უფრო მეტად გაჭირვებულ ოჯახებს გადასცეს.
სააკაშვილის შეფასებით, ვაუჩერების პროგრამით სახელმწიფო მოსახლეობისთვის გაძვირებული ცხოვრების სიმძიმის შემცირებას ცდილობს