ეკონომიკისა და მდგრადი განვითარების მინისტრი, მიხეილ სააკაშვილის "მესიჯებით" კმაყოფილია.
პრეზიდენტმა გუშინ პარლამენტში გამოსვლისას საქართველოს გრძელვადიანი განვითარების გეგმაზე ისაუბრა. ვერა ქობალია ამბობს, რომ გეგმის თანახმად ქვეყანაში უმუშევრობის დაძლევა მოხერხდება.
"პრეზიდენტის გამოსვლაში იყო კონკრეტული გეგმები, რომ რაც შეიძლება
მეტი ადამიანი დასაქმდეს. გეგმა რაც დაიდო 2015 წლამდე, გულისხმობს საქართველოში ტურიზმის, სოფლის მეურნეობის სექტორის განვითარებას, ჰესების აშენებას. ესენი კონკრეტული გეგმებია იმისთვის, რომ შეიქმნას სამუშაო ადგილების"- განაცხადა ეკონომიკისა და მდგრადი განვითარების მინისტრმა.
შეგახსენებთ რომ გუშინ პარლამენტში გამოსვლისას მიხეილ სააკაშვილმა განაცხადა, რომ საქართველოს გრძელვადიანი განვითარების პირველი გეგმა 2015 წლისთვის დასრულდება.
"სხვადასხვა საკითხზე საუბრისას არაერთხელ დავასახელე 2015 წელი. ჩვენ ვმოქმედებთ საქართველოს განვითარების გრძელვადიანი გეგმის მიხედვით, რომელიც არ ერგება მხოლოდ საარჩევნო ვადებს და ცალკეული პიროვნებების პოლიტიკურ კარიერას. კურსი აუცილებლად გაგრძელდება", - განაცხადა პარლამენტში წლიური მოხსენებით გამოსვლისას საქართველოს პრეზიდენტმა და განმარტა, რომ ყველა პროექტის განხორციელება, რომელიც საქართველოს განვითარების გრძელვადიან გეგმაში შედის, 2012-2013 წლებში დაიწყება.
"2015 წელი იქნება ამ გეგმის პირველი შედეგების შეჯამების წელიწადი", - დასძინა სააკაშვილმა, რომლის თქმითაც, აღნიშნული გეგმა უფუძნება საქართველოს შესაძლებლობებს, რეფორმათა მიმდინარეობის არსებულ დინამიკას, ადამიანურ და მატერიალურ რესურსებს.