საქართველოს პარლამენტის თავჯდომარის მოადგილის, მიხეილ მაჭავარიანის განცხადებით, საქართველო ინფლაციის პროცესს თავიდან ვერ აიცილებს.
"ერთ-ერთი ყველაზე დიდი პრობლემა არის ინფლაცია. პრეზიდენტმაც ნათლად თქვა თავის გამოსვლაში, რომ ვერ ავიცილებთ თავიდან ამ პროცესს. ჩვენთვის მთავარი ბრძოლა ინფლაციასთან არის დასაქმება. ჩვენთვის ერთ-ერთი მთავარი მიმართულება სოფლის მეურნეობაა და აქაც უნდა გამოვიდეთ იმ ეტაპიდან, როდესაც ვეხმარებოდიდით გლეხს საწვავით", - განაცხადა მაჭავარიანმა პარლამენტში სიტყვით გამოსვლისას.
მაჭავარიანის თქმით, საქართველოს ეკონომიკა პატარაა და მას მუდმივად სჭირდება ინვესტიციები.
"2004 წელს მივიღეთ ევროპაში ერთ-ერთი ყველაზე წარმატებული კოდექსი. მაგრამ დრო მოითხოვს ცვლილებებს. ამიტომ მოვიდა დრო, როცა მივიღეთ ახალი კოდექსი და დებატები გაიმართა ამაზე. საქართველოს ეკონომიკა პატარა ეკონომიკაა და მას მუდმივად სჭირდება ინვესტიციები. აქ მეწარმეს, გინდა უცხოელს და გინდა ქართველს, უნდა ჰქონდეს არჩევანი, რატომ უნდა ჩადოს ინვესტიცია ქართულ ეკონომიკაში და რატომ უნდა იყოს ეს არჩევანი ქართული ეკონომიკა და არა ჩვენი მეზობლების ეკონომიკა. ამიტომ ერთ-ერთი ყველაზე მნიშვნელოვანი ფაქტორი არის ეკონომიკის მოდერნიზაცია. ძლიერი ეკონომიკის გარეშე შეუძლებელია ძლიერი სახელმწიფოს ჩამოყალიბება", - აღნიშნავს მაჭავარიანი.
