"ეროვნულ-დემოკრატები" საქართველოს პრეზიდენტ მიხეილ სააკაშვილის ქართული სოფლის პრობლემების მოგვარებას სთხოვენ.
როგორც პრეზიდენტის პარლამენტში ყოველწლიური გამოსვლის შემდეგ დეპუტატმა გურამ ჩახვაძემ აღნიშნა, დროის მოთხოვნაა, რომ ხელისუფლება აგრარული რეფორმის აუცილებლობას მიხვდეს.
"ქართულ სოფელს, როგორც არასდროს, ისე სჭირდება სახელმწიფოს მხარდაჭერა. ისე, როგორც ამას აკეთებენ ცივილიზებული ქვეყნები, იქნება ეს ახალი ტექნოლოგიები, საბიუჯეტო სუბსიდირება თუ სადაზღვევო და კოოპერაციული სისტემები", - აღნიშნა ჩახვაძემ.
მისი თქმით, "მსოფლიო ეკონომიკური ფორუმის" (ჭEF) რეიტინგით საქართველო ანტიმონოპოლიური პოლიტიკის ეფექტიანობის მიხედვით ერთ-ერთ ბოლო ადგილზეა, რის გამოც ეკონომიკაში სამართლიანი კონკურენტული გარემოს, კერძოდ ევროპული ანტიმონოპოლიური კანონმდებლობის შემოღება უფრო აქტუალური ხდება, ისევე, როგორც მცირე ბიზნესისადმი ინსტიტუციონალური, საგადასახადო და ფინანსური მხარდაჭერის გაძლიერება.
"თქვენ აღნიშნეთ, რომ გინდათ საქართველო გაიყვანოთ სამშვიდობოზე, ამიტომ მოგიწოდებთ ეროვნულ-დემოკრატები, შეცვალეთ კურსი იმ სფეროებში, სადაც ჩავარდნაა, რადგან ჩვენი შანსი სამშვიდობოზე გასვლისა პოლიტიკურად, სოციალურად და ეკონომიკურად წარმატებული საქართველოა", - მიმართა პრეზიდენტს ჩახვაძემ.