ვხედავთ, უკრაინას და მოლდოვას რა მხარეც აქვთ არჩეული, მოლდოვის შემთხვევაში, მზად არის, საკუთარი ქვეყანა გააუქმოს და რუმინეთის შემადგენლობაში შეიყვანოს, ხოლო უკრაინის შემთხვევაში მზად არიან, საკუთარი ქვეყანა ააოხრონ, - ამის შესახებ პარლამენტის ვიცე-სპიკერმა ნინო წილოსანმა განაცხადა.
წილოსანმა კომენტარი გააკეთა მოლდოვის პრეზიდენტის მაია სანდუს განცხადებაზე. მაია სანდუმ აღნიშნა: „რუსეთმა საქართველო თავის ორბიტაზე დააბრუნა ომის შიშის იარაღად გამოყენებით და იმ გზავნილებით, რომ არჩევნებზე არასწორი არჩევანი მშვიდობის ფასად დაუჯდებოდათ“.
წილოსანის თქმით, ადვილად მისახვედრია, სანდუ რომელ პოლიტიკურ ორბიტას წარმოადგენს.
„მაია სანდუს შეუძლია, ასე უტიფრად განაცხადოს, რომ საკუთარ ქვეყანას გააუქმებდა და რუმინეთის შემადგენლობაში შეიყვანდა. ალბათ, ადვილად მისახვედრია, რომელ პოლიტიკურ ორბიტას წარმოადგენს. ეს ადამიანი მცდელობას არ იშურებდა, რომ საქართველოში მიმდინარე პროცესებზე, ცეცხლზე ნავთი დაესხა და ყოველთვის შიდა არეულობის მომხრე გვევლინებოდა. უფრო მეტიც, მან 4 ოქტომბერს სახელმწიფო გადატრიალების მცდელობაში ჩართული ადამიანები გაამხნევა და იქიდან მოუწოდა, თქვენს მხარეს ვარ, თქვენ იცით, წარმატებებს გისურვებთო. საქართველოსთან დაკავშირებით მაია სანდუს მიერ გაკეთებული განცხადებების კეთილსინდისიერებაში ეჭვი გვეპარება. ქართველებისთვის მისაბაძი ვერასოდეს იქნება ის ადამიანი, რომელიც მზად არის, საკუთარი ქვეყანა გააუქმოს და სხვა ქვეყნის შემადგენლობაში შეიყვანოს.
სამწუხაროდ, პირველი შემთხვევა არ არის, როცა უკრაინა და მოლდოვა საქართველოს წინააღმდეგ გვევლინებიან. წლების მანძილზე, ისინი ღია თუ დახურულ ფორმატებში ყველაფერს აკეთებდნენ, რომ საქართველოს კანდიდატის სტატუსი არ მიეღო, ქვეყანაში არეულობა ყოფილიყო და ამ არეულობისთვის მხარი დაეჭირათ. ერთხელაც არ დაუგმიათ ფაქტი, რომ საქართველოში სახელმწიფო გადატრიალების მცდელობა მიმდინარეობდა. სამივე ქვეყანა კანდიდატი სახელმწიფოები ვართ, თუმცა ვხედავთ, უკრაინას და მოლდოვას რა მხარეც აქვთ არჩეული. მოლდოვის შემთხვევაში, მზად არის, საკუთარი ქვეყანა გააუქმოს და რუმინეთის შემადგენლობაში შეიყვანოს, ხოლო უკრაინის შემთხვევაში მზად არიან, საკუთარი ქვეყანა ააოხრონ. როგორც ურსულა ფონ დერ ლაიენმა მოუწოდა. ეს ის ხალხია, ვისაც ევროპის იდეისთვის შეუძლია, ასიათასობით მოქალაქის სოცოცხლე გაწირონ, იომონ და საკუთარი ქვეყანა ააოხრონ“, – განაცხადა ნინო წილოსანმა.
