"არ არსებობს მიზეზი, თუ რატომ არ უნდა ვაქციოთ საქართველო საოცნებო დასასვენებელ კურორტულ ზონად", _ განაცხადა საქართველოს პრეზიდენტმა პარლამენტში ყოველწლიური გამოსვლისას.
"ბევრი ახსნა არ სჭირდება იმას, თუ რატომ არის საქართველოში ტურისტული პოტენციალის განვითარების დიდი შანსი. ჩვენ გვაქვს საშუალება, გვქონდეს სამშობლო წარმტაცი ბუნებით, რასაც ემატება ჩვენი კულტურა და სტუმართმოყვარეობა. ტურიზმის განვითარება გვინდა არა მხოლოდ ტურისტების თავმოსაწონად, არამედ, უპირველესად, ჩვენი მოქალაქეების სწრაფი ეკონომიკური განვითარებისთვის, მათი შემოსავლების ზრდისთვის", _ აღნიშნა პრეზიდენტმა.
მისი თქმით, სხვა დარგებისგან განსხვავებით, ტურიზმს გაცილებით სწრაფად შეუძლია მოგების მოტანა და ეკონომიკის გამოცოცხლება. ამით პრეზიდენტი რეგიონებში დეპრესიისა და უმუშევრობის აღმოფხვრას ფიქრობს.
"კერძო სექტორთან აქტიური თანამშრომლობით იქნება ბევრი ახალი კურორტი და ტრადიციული ტურისტული კერები. ჩვენ ვქმნით თავისუფალ ტურისტულ ზონებს. ვქმნით პრაქტიკულად ახალ ქალაქებს, დიდი ტურისტული პოტენციალით. ვაშენებთ ახალ სათხილამურო კურორტებს. ვქმნით ტურისტული ზონების იერსახეს და არქიტექტურას", - განაცხდა სააკაშვილმა.
პრეზიდენტის თქმით, 15 სასტუმროს მშენებლობა იწყება ანაკლიაშიც, რომელიც დიდ კურორტად გადაიქცევა. სამომავლოდ ამას ემატება მესტიაში რამდენიმე ათეული სასტუმროს მშენებლობა, მსოფლიოს მასშტაბით ჩვენი ქვეყნის პოპულარიზაცია.
თუმცა სააკაშვილი მიიჩნევს, რომ ეს ყველაფერი ზღვაში წვეთია იმასთან შედარებით, რა პოტენციალიც გვაქვს ამ დარგში.
"გასაკეთებელი ძალზე ბევრია. ჩვენი გეგმა ამბიციურია, მაგრამ შევასრულებთ. 2015 წელს საქართველოს წლიური ვიზიტორების რაოდენობა 5 მილიონს მიაღწევს და საერთო ჯამში, ქვეყნის პოტენციალი 2-3 წელიწადში 10 მილიონი იქნება", _ აღნიშნა სააკაშვილმა.
