"სოფლის მეურნეობის პროდუქტების გაძვირებასთან ბრძოლის ორი გზა გვაქვს", - განაცხადა საქართველოს პრეზიდენტმა მიხეილ სააკაშვილმა პარლამენტში ყოველწლიური მოხსენების დროს სიტყვით გამოსვლისას.
"ერთი არის ის, რომ პირდაპირ ოჯახებს მივცეთ დახმარება, რათა გაძვირებული სასურსათო კალათა დაფარონ ამ 30 ლარით და მეორე - ჩავდოთ ფული ეკონომიკაში", _ განაცხადა საქართველოს პრეზიდენტმა და აღნიშნა, რომ
ერთ-ერთი ინსტრუმენტი, რომლითაც უნდა ვებრძოლოთ აგროსამრეწველო კომპლექსში პროდუქციაზე ფასის ზრდას, არის ადგილობრივი სოფლის მეურნეობის წარმოების განვითარება.
"ჩვენი სოფლის მეურნეობა რომ იმაზე განვითარებული იყოს, ვიდრე არის ახლა, უფრო მეტად რომ ვაწარმოებდეთ ადგილობრივ სასურსათო პროდუქციას, საქართველო გაცილებით ძლიერი პოზიციებით შეხვდებოდა მსოფლიოში ფასების ზრდასაც და კრიზისსაც. ამისათვის მოვაგროვეთ დონორებთან ერთად და გამოვყოფთ დამატებით იმ 30 მილიონი ლარისა, რომელიც უშუალოდ გადაგვატანინებს ყველაზე მძიმე შემდგომ კვარტალს, იმიტომ, რომ ეს არის კვარტალი, რომელიც წინ უძღვის მსოფლიოში მოსავალს და ყველაზე უფრო მერყევია. შემდეგ ველით გაუმჯობესებას, მაგრამ ეს არის მოკლევადიანი გამოსავალი, ხოლო 150 მილიონ ლარს გამოვყოფთ იმისთვის, რომ შემდგომი ათწლეულების და უახლოესი ერთი წლის განმავლობაში მივიღოთ და დავინახოთ სერიოზული შედეგები, რათა ეს გაგვყვეს შემდეგ ათწლეულების განმავლობაში", _ განაცხადა საქართველო პრეზიდენტმა და დასძინა, რომ ამიტომაც საქართველო იწყებს მარცვლეული წარმოების ინტენსიფიკაციის პროგრამას, რომელიც ითვალისწინებს მაღალმოსავლიანი ჯიშების დანერგვას საქართველოში.
"ყველა მსურველს შეუძლია დარეგისტრირდეს პროგრამაზე და მიიღოს ხარისხიანი მაღალმოსავლიანი თესლი, ხოლო მისი საფასური შვიდი თვის შემდეგ გადაიხადოს", _ აცხადებს სააკაშვილი.
