როგორც არ უნდა ეცადოთ, ცრუ ჩვენებას, ვერ მიიღებთ ვერც ბაჩო ახალაიასგან, რომელსაც მეუღლის დაჭერით ემუქრებოდით, - ამის შესახებ 4 ოქტომბრის საქმეზე დაკავებულმა პაატა ბურჭულაძემ სასამართლო სხდომაზე განაცხადა.
მისი თქმით, თუ სასამართლოს სასახლის ღობე აინტერესებს, რომელიც აქციის მონაწილეებს "წინასწარ გადაჭრილი დახვდათ", მაშინ გამოკითხვაზე ირაკლი კობახიძე უნდა დაიბარონ, რომელმაც თქვა, "მათ იქ ჩვენ სიურპრიზი დავახვედრეთო".
"ძალიან მესიამოვნა, რომ მე მისმენთ და მელაპარაკებით.... გადაწყვიტოთ, ვარ თუ არა დამნაშავე.
მოდი, გავერკვეთ ვითარებაში, რას იძიებთ თქვენ, იმას თუ რა მოხდა 4 ოქტომბერს, თუ იმას ვინ დააზიანა ღობე. ეს დაკავება მხოლოდ ერთ ფაქტს ემსახურება, სახალხო კრების, როგორც წარმატებულის გადაფარვას და მის ძალადობად შეფასებას.
4 ოქტომბერი იყო ყველაზე მნიშვნელოვანი დღე, ამით ვამაყობ და ამის გამო მასამართლებთ? სამ პუნქტში მდებთ ბრალს, დამხობა, ძალადობა და ძალადობისკენ მოწოდება და სტრატეგიული ობიექტის ხელში ჩაგდება. ძალადობისკენ მოწოდება - მანახეთ ერთი ვიდეო, სადაც ძალადობისკენ მოვუწოდებ, თუ ვერ მანახებთ, ეს მუხლი მოხსნილია. მეორე დამხობაა, სულ ვამბობდი მშვიდობიან დამხობას, დამხობაა რაც ირანში ხდება, მშვიდობიანი დამხობაა, რაც რუსთაველზე მოხდა. 4 ოქტომბერს არჩევნები კი არა მათი გადარჩევა და დამხობა მოხდა. თუ დამეთანხმებით, რომ მართალს ვამბობ, ეს მუხლიც მოხსნილია. რაც შეეხება სტრატეგიული ობიექტის ხელში ჩაგდებას, 100 000 ადამიანს ამ შენობის აღება რომ ნდომებოდა, ვერ ავიღებდით? ეს მუხლიც მოიხსნა. ყურადღება ღობეზე გადააქვთ, რომელიც წინასწარ გადაჭრილი დაგვხვდა, 60-ზე მეტი უდანაშაულო ადამიანი დააკავეს, სინდისის და ეს პატიმრები დასაკავებელი კი არა, ხელის გულზეა სატარებელი. თუ მაინც და მაინც ღობე გაინტერესებთ, პრემიერ-მინისტრი დაიბარეთ, რომელმაც თქვა, "მათ იქ ჩვენ სიურპრიზი დავახვედრეთო".
ბედნიერი ვარ, რომ 4 ოქტომბრის ისტორიული სახალხო კრების დამფუძნებელი ვარ, მე ვარ და დაანებეთ ამათ თავი.
როგორც არ უნდა ეცადოთ, ცრუ ჩვენებას, ვერ მიიღებთ ვერც ბაჩო ახალაიასგან, რომელსაც მეუღლის დაჭერით ემუქრებოდით, ვერც ევა შაშიაშვილისგან," - განაცხადა ბურჭულაძემ.
თბილისის საქალაქო სასამართლოში, დღეს, პაატა ბურჭულაძის, ირაკლი ნადირაძის, მურთაზ ზოდელავას, პაატა ბურჭულაძის, ლაშა ბერიძის და კიდევ სხვა დაკავებულების პროცესი მიმდინარეობს.
