ყველა პრობლემა და პრობლემატიკა უნდა მშვიდობიანი გზით გადაწყდეს, მოლაპარაკების გზით გადაწყდეს , - ამის შესახევ "ქართული ოცნების" დეპუტატმა დავით მათიკაშვილმა ირანში მიმდინარე მოვლენებთან დაკავშირებით განაცხადა.
"ჩვენ, რა თქმა უნდა, შეშფოთებით ვუყურებთ იმ მოვლენებს, რომელიც ირანში ვითარდება. ჩვენ ირანს ვუსურვებთ მშვიდობას, ირანის საზოგადოებას ვუსურვებთ დამშვიდებას და რა თქმა უნდა, იმ ძალადობას და ძალმომრეობას, რომელიც ხორციელდება ქვეყანაში, ამ ყველაფრის შეწყვეტას ვისურვებდით.
ყველა პრობლემა და პრობლემატიკა უნდა მშვიდობიანი გზით გადაწყდეს, მოლაპარაკების გზით გადაწყდეს და რა თქმა უნდა, ძალმომრეობა არის სრულიად დაუშვებელი", - განაცხადა მათიკაშვილმა.
ირანში უკვე ორ კვირაზე მეტია მასშტაბური ანტისამთავრობო დემონსტრაციები მიმდინარეობს. დემონსტრაციები ქვეყნის მასშტაბით 585 ადგილას - 186 ქალაქსა და 31-ვე პროვინციაში იმართება.
საპროტესტო მოძრაობის დაწყება მზარდ ინფლაციასა და ეროვნული ვალუტის კოლაფსს მოჰყვა. ტელეარხი CBS News-ის ცნობით, ირანში დაღუპულთა რაოდენობა 12-დან 20 ათასამდეა. აშშ-ში დაფუძნებული ადამიანის უფლებათა დამცველი ჯგუფი კი აცხადებს, რომ საპროტესტო აქციების დაახლოებით 2 400 მომიტინგე დაიღუპა. ამასთან, 132 საათზე მეტია, ირანის მოსახლეობის უმეტეს ნაწილს ინტერნეტზე წვდომა შეზღუდული აქვს.
