ვასრულებდი ჩემს პროფესიულ მოვალეობას. ვფიქრობ, რომ ჩემი იქ შესვლით გარკვეული რაოდენობის ადამიანი გადავარჩინე,- ამის შესახებ 4 ოქტომბრის მოვლენებთან დაკავშირებით ბრალდებულმა ექიმმა, გიორგი ჩახუნაშვილმა განაცხადა.
მისი თქმით, დღესაც იგივეს გააკეთებდა.
"მე ადრეც ვამბობდი და ახლაც ვიტყვი, რომ ვასრულდებდი ჩემს პროფესიულ მოვალეობას. მე ვფიქრობ, რომ იქ რომ შევედი, გადავარჩინე გარკვეული რაოდენობის ხალხი. დღესაც იგივეს გავაკეთებდი. იქ თითოეულ მოძრაობას, გამოყვანას, შეყვანას აქვს თავისი გადამრჩენი მნიშვნელობა, ამიტომ, მე იქ რას ვანიშნებ, ეს იყო მხოლოდ სამედიცინო ქმედებები. რაც იქ გავაკეთე იყო სასიკეთოდ გაკეტებული, რომ იქ ვინც იყო გადარჩენილიყო", - განაცხადა გიორგი ჩახუნაშვილმა.
4 ოქტომბერს თბილისში განვითარებულ მოვლენებთან დაკავშირებით გიორგი ჩახუნაშვილის მიმართ ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინა, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს. მასთან ერთად ბრალდებულები არიან - გოჩა ყატაშვილი, სულხან აბრალავა, კონსტანტინე კოკაია, დავით ჟღენტი, კახაბერ მჟავანაძე, ალექსანდრე გოგოლაძე, დავით სტურუა, ევა შაშიაშვილი, ზაქრო ალბუთაშვილი, გენადი კელიხაშვილი, დათო ღუწკაია, რამაზ ჯორბენაძე, ჯანდრი თირქია და ია დარახველიძე.
