უკანასკნელი თვეების განმავლობაში „ქართული ოცნების“ ყველა ქცევა მიანიშნებს, რომ უნდა საქართველოს სრულ იზოლაციაში მოქცევა, ამ ქვეყნის თავიდან ბოლომდე რუსეთის სატელიტ დიქტატორულ რეჟიმად გადაქცევა, - ამის შესახებ „ლელო – ძლიერი საქართველოს“ წევრმა, თაზო დათუნაშვილმა განაცხადა.
მისი თქმით, „ქართულ ოცნებას“ ევროსაბჭოს დატოვების სურვილიც აქვს.
„უკანასკნელი თვეების განმავლობაში „ქართული ოცნების“ ყველა ქცევა ანიშნებს, რომ საქართველოს უნდა სრულ იზოლაციაში მოქცევა, ამ ქვეყნის თავიდან ბოლომდე რუსეთის სატელიტ დიქტატორულ რეჟიმად გადაქცევა. უნდა თუ არა საქართველოს დღევანდელ ხელისუფლებას დატოვოს ევროსაბჭო? – ცალსახად უნდა, რადგან ერთადერთ ხინჯად არის დარჩენილი ვალდებულება, რომ უნდა აღასრულოს ევროპის სასამართლოს გადაწყვეტილებები და ის რეკომენდაციები, რომლებსაც ვენეციის კომისიის მსგავსი ორგანიზაციები გასცემენ. ეს მათთვის დიდი პრობლემაა, რადგან ისინი დიქტატორულ რეჟიმში ოპერირებენ და ამ რეჟიმს აყალიბებენ. თუმცა, რამდენად იქნება ეს ნაბიჯი გადადგმული, ამას ვიხილავთ. ყოველ შემთხვევაში, ყველაფერი ამას აჩვენებს, მათი რიტორიკა, ქცევა. მათ სურვილი აქვთ, საქართველო არ იყოს არცერთი იმ ორგანიზაციის წევრი, რომელსაც მათზე ზემოქმედების ბერკეტები ექნება. განა იმიტომ, რომ ვენეციის კომისიამ გავლენა დაკარგა, ვენეციის კომისიას საკმარისზე მეტი გავლენა აქვს, რათა საქართველოს ავტოკრატიული რეჟიმის კანონებზე სწორი დასკვნები გამოიტანოს. ამერიკის მაგალითის შემოტანაც სხვა განზომილებაა საქართველოსთან მიმართებით. „ქართული ოცნება“ ვენეციის კომისიის დასკვნებს დიდი ხანია, არ ითვალისწინებს, ამერიკის გასვლა-შემოსვლა არაფერს შუაში არ არის. ეს უბრალოდ დამატებითი პროპაგანდისტული ხმაურია, რომლითაც ცდილობენ თავიანთი ნაძირლობის გამართლებას.
რაც შეეხება იმას, მივიღებთ თუ არა მონაწილეობას პარტიების აკრძალვის განხილვაში, ჩვენ ვიყავით პირველები, რომლებმაც საკონსტიტუციო სარჩელზე განაცხადი გავაკეთეთ. ჩვენ ვიბრძოლებთ, ვუჩივლებთ „ქართულ ოცნებას“ და მთელ ამ პროცესს ანტიკონსტიტუციურად გამოვაცხადებთ. არ ვაპირებთ, რომ უბრძოლველად დავთმოთ რაიმე პოზიცია, მიუხედავად იმისა, რომ დიქტატორულ რეჟიმში ვართ და საკონსტიტუციო სასამართლოს არავითარი ინსტიტუციური ძალა არ გააჩნია. ჩვენ ვიბრძვით ბოლომდე, ვიბრძვით ქუჩაში, პარტიულ საქმიანობაში და ვიბრძოლებთ მათ შორის სამართლებრივად, მიუხედავად იმისა, რომ არასამართლებრივ სახელმწიფოში ვცხოვრობთ“, – განაცხადა დათუნაშვილმა.
