დარწმუნებული ვარ, ქვეყანაში ერთსულოვნებაა, შეიძლება ეს არ ჩანს, შეიძლება მაინც ვლანძღავდეთ ერთმანეთს, მაგრამ სადღაც დგას ის ქართული სული, ერთობა, გადარჩენის ჟინი, რომელმაც აქამდე მოგვიყვანა და შორსაც წაგვიყვანს - მზად ვართ, რომ ეს რეჟიმი წავიდეს მშვიდობიანად, დაგვემშვიდობოს ისე, როგორც ეს წელი დაგვემშვიდობება,- ამის შესახებ საქართველოს მეხუთე პრეზიდენტის, სალომე ზურაბიშვილის საახალწლო მილოცვაშია აღნიშნული.
მისი თქმით, მას შემდეგ, რაც „ქართული ოცნება“ ხელისუფლებიდან წავა, „დაიწყება ყველაზე რთული და ყველაზე დიდი საქმე - ქვეყნის აშენება“.
"მიდის 2025 წელი. მიდის ისე, რომ დიდად არ დაგვენანება მისი წასვლა. არ ვაპირებ, გავიხსენო ეს უმძიმესი წელი და გავიხსენო ის ყველაფერი, რაც ამ წელს მოხდა. ძალიან ბევრი მოხდა ისეთი, რაც ჩვენთვის, ყველასთვის სამარცხვინოა, ჯობს, რომ დღეს ეს ყველაფერი დავივიწყოთ ცოტა ხნით და ვიფიქროთ იმაზე, რა იქნება 2026 წელს. მე მჯერა 2026 წლის. იმიტომ რომ გარდა ყველაფერი ცუდისა, დავინახე თქვენი შემართება, გამძლეობა. ეს ეხება სინდისის პატიმრებს. არ შეიძლება ისინი არ გავიხსენო და პირველ რიგში მათ არ მივულოცო ახალი წელი და ვუსურვო ახალი იმედები. დავინახე გამძლეობა სინდისის პატიმრების მშობლების, არაჩვეულებრივი გამძლეობა, ყოველდღიური, რაც უანგარო სიყვარულია, რომელიც ძალიან გვჭირდება დღეს და ხვალ. ესეც ჩვენთვის იმედის მომცემია, დავინახე ზოგადად, ქვეყანაში შემართება, დავინახე ხვალინდელი საქართველო, რომელიც არ შეეგუება იმას, რომ გახდეს რუსეთი ან რუსეთის მაგვარი, ან რუსეთის პატარა კოლონია. დავინახე საქართველო რომელიც ხვალ ააშენებს ახალ ქვეყანა, სადაც კანონი იკანონებს, სასამართლო იქნება სასამართლო, პატიმრები იქნებიან ადამიანები, რომლებმაც დააშავეს რამე და არა ისინი, ვინც ტროტუარზე იდგნენ. დავინახე საქართველო, სადაც ახალგაზრდები მიიღებენ განათლებას. არ წავლენ არსად და ამ ქვეყანაში მიიღებენ განათლებას და ეს არ მოვა რაღაც უაზრო ვითომ რეფორმის საფუძველზე. მოვა იმიტომ, რომ სურვილი იმისა, რომ ადამიანებმა მიიღონ განათლება არის ის, რაც მოგვყვება ოდითგანვე და რაც ყველაზე მეტად აღიზიანებს რუსეთს: განათლებული საქართველო, ფეხზე დამდგარი საქართველო. მე ეს დავინახე, მჯერა, ხვალ ასეთი საქართველო მოდის. ჩვენზეა დამოკიდებული, დამოკიდებულია იმაზე, რომ ყველა არ წავიდეთ, არ გადავწყვიტოთ, რომ აქ არაფრის იმედია, მივხუროთ კარი და წავიდეთ. ვიღაც წავა, ვიღაც დაბრუნდება, ყველას ერთად გვაქვს დიდი საქმე, არავის არ შეიძლება მოსწონდეს, რომ რეჟიმი მთლიანად ოკუპირებულია კრიმინალების და კორუმპირებული ადამიანების იერ. დარწმუნებული ვარ, არავის მოსწონს. ვიღაც ჩუმადაა, ვიღაც ღიად ამბობს. ამიტომ , ჩვენ მზად ვართ, რომ ეს რეჟიმი წავიდეს მშვიდობიანად. დაგვემშვიდობოს ისე, როგორც ეს წელი დაგვემშვიდობება. მერე დაიწყება ყველაზე რთული და ყველაზე დიდი საქმე - ქვეყნის აშენება, სადაც ბევრი რამე უკვე განადგურებულია: ინსტიტუტები, კანონი, სასამართლო, ეკონომიკა, რომელიც ვითომ გადადუღდა, დღეს კი თურმე ფასები მაღალია და ჯობს ევროპაში წავიდეთ და იქ ვიყიდოთ, ვიდრე აქ. ის, რომ ამ ქვეყანაში თურმე ბავშვებს საჭმელს ჰპარავენ, ეს სრის ის, რაც არავის აღარ გვინდა.
დარწმუნებული ვარ, ქვეყანაში ერთსულოვნებაა, შეიძლება ეს არ ჩანს, შეიძლება მაინც ვლანძღავდეთ ერთმანეთს, მაგრამ სადღაც დგას ის ქართული სული, ერთობა, გადარჩენის ჟინი, რომელმაც აქამდე მოგვიყვანა და შორსაც წაგვიყვანს. გილოცავთ ახალ წელს!“,- ნათქვამია სალომე ზურაბიშვილის მილოცვაში.
