რუსეთის პრეზიდენტ ვლადიმირ პუტინის პასუხი ცეცხლის შეწყვეტის ზავთან დაკავშირებით ცინიკური და ბრუტალური იყო, - ამის შესახებ გერმანიის კანცლერმა, ფრიდრიხ მერცმა განაცხადა ბუნტესთაგში გამოსვლისას განაცხადა..
„ბერლინმა ბოლო დღეებსა და საათებში დიპლომატიის თვალსაზრისით, რაც შეეძლო ყველაფერი გააკეთა, მაგრამ ყველა იმ ადამიანმა, ვინც ახლა მიიჩნევს, რომ მხოლოდ დიპლომატიას შეუძლია ამ ომის დასრულება, უნდა გაიხსენოს, რა უპასუხა პრეზიდენტმა პუტინმა ჩემს საჯარო მოთხოვნას, რომ შობაზე მაინც შეეწყვიტათ ცეცხლი. ამ მოთხოვნაზე პასუხი უფრო ცინიკური და ბრუტალური ვერ იქნებოდა“, – განაცხადა ფრიდრიხ მერცმა.
მანამდე კანცლერმაპუტინს მოუწოდა, რომ საშობაოდ ცეცხლის შეწყვეტას დათანხმებოდა. თუმცა კრემლის პრესსპიკერმა, დმიტრი პესკოვმა განაცხადა, რომ ცეცხლის შეწყვეტის შესახებ ზავი დამოკიდებული იქნება იმაზე, მიღწეული იქნება თუ არა სამშვიდობო შეთანხმება.
კანცლერის თქმით, უკრაინამ უნდა შეინარჩუნოს რუსეთის მხრიდან პოტენციური თავდასხმებისგან ეფექტურად დაცვის უნარი. ამისთვის საჭიროა ძლიერი შეიარაღებული ძალები და საერთაშორისო პარტნიორების სანდო, სასარგებლო გარანტიები.
მერცმა აღნიშნა, რომ ბერლინში ბოლო კონსულტაციების დროს მნიშვნელოვანი ნაბიჯები გადაიდგა.
„ჩვენ კარგად გვესმის ომის ფასი. ახლა მშვიდობის ფასზე ვსაუბრობთ.
და ეს ფასი მოიცავს გერმანიის წვლილს, მოკავშირეებთან ერთად, უკრაინისთვის უსაფრთხოების გარანტიების შექმნაში ცეცხლის შეწყვეტის შემდეგ“, - განაცხადა მერცმა.
