"ქართული ოცნება" ანტიევროპულ ნარატივს ავრცელებს. ქვეყანამ სერიოზული დემოკრატიული უკუსვლა აჩვენა," - ამის შესახებ ევროპარლამენტარმა მარი ბიერემ სტრასბურგში, ევროპარლამენტის პლენარულ სესიაზე განაცხადა, სადაც საქართველოს საკითხი განიხილება.
"ერთი წლის წინ ასობით ათასი ადამიანი ქუჩაში გავიდა დემოკრატიული ღირებულებების და ძლიერი ევროპული მისწრაფებების დასაცავად. მიუხედავად პოლიტიკური ძეწოლისა, დაშინებისა და მცდელობისა, რომ შეევიწროვებინათ მათთვის საჯარო სივრცე ბევრმა მათგანმა აჩვენა შესანიშნავი გამძლეობა.
ევროკავშირმა და მათ შორის ამ პარლამენტმა რამდენჯერმე გამოხატა შეშფოთება საქართველოში მიმდინარე დემოკრატიული უკუსვლის შესახებ.
ჩვენი შეშფოთება შემდეგია: კანონის უზენაესობის გაუარესება, პოლიტიკურად მოტივირებული დაკავებები, დამოუკიდებელ მედიაზე ზეწოლა და 2025 წლის მუნიციპალური არჩევნები - ჩვენ შეშფოთებულები ვართ მიზანმიმართულ დეზინფორმაციის და ანტიევროპული ნარატივის გამო რომელსაც ავრცელებენ საქართველოს ხელისუფლების მაღალჩინოსნები. საქართველომ გადაწყვიტა არ მიიღოს მონაწილეობა ევრონესტის საპარლამენტო ასამბლეაში, რომელიც ერევანში გაიმართა. საბჭომ გამოხატა პოზიცია რომ ეს ქმედებები არ შეესაბამება ევროკავშირის კანდიდატი ქვეყნის ქმედებებს. საქართველომ აჩვენა სერიოზული დემოკრატიული უკუსვლა მათ შორის 9 ნაბიჯის შესრულების კუთხით, რა პირობითაც მიენიჭა მას კანდიდატის სტატუსი.
საქართველოს ევროკავშირში გაწევრიანების პროცესი რეალურად გაჩერებულია და ასე იქნება მანამდე, ვიდრე საქართველოს მთავრობა არ გამოაჩენს მტკიცე მზაობას შეაბრუნოს თავისი კურსი და დაუბრუნდეს ევროკავშირში გაწევრიანების გზას. ეს საჭიროებს: ყველა უკანონოდ დაპატიმრებული პოლიტიკოსის, ჟურნალისტისა და აქტივისტის გათავისუფლებას, რეპრესიული კანონმდებლობის გაუქმებას, დემოკრატიული, ყოვლისმომცველი და გამძლე რეფორმების განხორციელებას, რაც ევროპული ინტეგრაციის პრინციპებს შეესაბამება, და ევროკავშირის წინააღმდეგ აგრესიული ნარატივის შეჩერებას.
მაგრამ საშუალება მომეცით ხაზი გავუსვა, რომ საქართველოს ევროპული გზა ღია რჩება. ჩვენ განაჩენს არ გავცემთ, ჩვენ საგზაო რუკას ვთავაზობთ ევროპული მომავლისთვის, რაც ქართველების უმრავლესობის სურვილს შეესაბამება. როდესაც კომენტარს ვაკეთებ პროტესტების დაწყების ერთ წლისთავზე, პატივი უნდა ვცეთ ათასობით ქართველს - სტუდენტებს, ჟურნალისტებს, აქტივისტებსა და უბრალოდ მოქალაქეებს - ვინც მშვიდობიანად დგას დემოკრატიისთვის. მათ დაახვედრეს ძალადობა, დაშინება, და უკანონო დაკავებები. მაგრამ მათ გააგრძელეს, მათი სიმამაცე შემახსენებელია, რომ ევროპული ღირებულებები ცოცხალია საქართველოში,” - განაცხადა ბიერემ.
