ახლა უკრაინისთვის რეალური სამშვიდობო პროცესის შანსი არსებობს, - ამის შესახებ გერმანიის კანცლერმა ფრიდრიხ მერცმა ვოლოდიმირ ზელენსკისთან ერთობლივ პრესკონფერენციაზე განაცხადა.
მისი თქმით, ეს შანსი რეალურია.
„ბოლო რამდენიმე დღისა და კვირის განმავლობაში ჩვენ ვმუშაობდით უკრაინაში ცეცხლის შეწყვეტის გზის გაკვალვაზე. ყველამ ვიცით ამ ომის ფასი და ახლა დროა ვისაუბროთ მშვიდობის ფასზე. ეს მოიცავს უსაფრთხოების გარანტიების, ტერიტორიების და ეფექტური მექანიზმის საკითხებს, რომელიც გააკონტროლებს ცეცხლის შეწყვეტის შეთანხმებას და მის შესრულებას“, - განაცხადა მერცმა.
კანცლერმა ხაზი გაუსვა დონალდ ტრამპის სპეციალური წარმომადგენლების, სტივენ უიტკოფისა და ჯარედ კუშნერის გადამწყვეტ როლს, რომელთა გარეშეც ეს დადებითი დინამიკა არ იქნებოდა.
მისი თქმით, უკრაინული, ევროპული და ამერიკული მხარეები ხუთ საერთო მიზანს მიჰყვებიან.
„პირველ რიგში, ოთხწლიანი ომის შემდეგ, ჩვენ გვსურს ცეცხლის შეწყვეტა, რომელიც უკრაინის სახელმწიფოს სუვერენიტეტს შეუნარჩუნებს.
მეორეც, ეს ცეცხლის შეწყვეტა უნდა იყოს უზრუნველყოფილი შეერთებული შტატებისა და ევროპელების მხრიდან მნიშვნელოვანი სამართლებრივი და მატერიალური უსაფრთხოების გარანტიებით.
ის, რაც აშშ-მა შემოგვთავაზა სამართლებრივი გარანტიების თვალსაზრისით, დიდ ყურადღებას იმსახურებს; ეს რეალური პროგრესია, რასაც ძალიან მივესალმები.
მესამე, ჩვენ ერთად ვამუშავებთ ცეცხლის შეწყვეტის შეთანხმებას - უკრაინელები, ევროპელები და ამერიკელები...
მეოთხე, ცეცხლის შეწყვეტამ არ უნდა იმოქმედოს უარყოფითად ევროკავშირის ერთიანობასა და სიძლიერეზე; პირიქით, მან კიდევ უფრო უნდა გაგვაერთიანოს.
და მეხუთე, ცეცხლის შეწყვეტამ უნდა შეინარჩუნოს უკრაინის ევროპული პერსპექტივა და ხელი შეუწყოს უკრაინის აღდგენას“, - განაცხადა მერცმა.
ამავდროულად, მისი თქმით, „მთავარი კითხვა რჩება, თუ როგორ უნდა მოგვარდეს ტერიტორიული საკითხი“.
„ამ კითხვაზე პასუხის გაცემა მხოლოდ უკრაინელ ხალხს და უკრაინის პრეზიდენტს შეუძლია, რომლებიც უკვე თითქმის ოთხი წელია საკუთარ მიწას იცავენ. და აქაც ერთსულოვანი ვართ: უკრაინა ტერიტორიული დათმობების საკითხს უკრაინა წყვეტს“, - აღნიშნა მერცმა.
მისი თქმით, რუსეთის ფედერაცია „დროის მოგებას ცდილობს და მაქსიმალურ მოთხოვნებს აყენებს“, ამავდროულად, არანაკლებ სისასტიკით აგრძელებს დამპყრობლურ ომს, თუმცა „ეს ჩვენს გზას არ გადაგვახვევინებს“.
„ჩვენ გვსურს, მოსკოვი ვაიძულოთ, შეწყვიტოს თავისი თამაში და ცეცხლის შეწყვეტისკენ წავიდეს. ამიტომ, ევროპელები სისტემატურად გაზრდიან ზეწოლას რუსეთზე“, - თქვა მერცმა.
„პირველ რიგში, ჩვენ ახლა ვმუშაობთ ევროპაში გაყინული რუსული აქტივების გამოყენებაზე უკრაინის შეიარაღებისთვის. და ეს იქნებოდა უსაფრთხოებისკენ გადადგმული მართლაც მნიშვნელოვანი ნაბიჯი. პირველი ნაბიჯი უკვე გადადგმულია. ეს აქტივები ახალი სამართლებრივი საფუძვლის მიხედვით განუსაზღვრელი ვადით არის გაყინული. ხუთშაბათს, ევროპული საბჭოს თანხმობით, ჩვენ მივაღწევთ შეთანხმებას პოლიტიკურ დონეზე. მე ევროკომისიას წინადადება წარვუდგინე და ამაზე ვისაუბრებთ. ჩვენ ვითვალისწინებთ ბელგიისა და სხვა ქვეყნების დასაბუთებებსა და შენიშვნებს“, - დასძინა მერცმა.
