ეს NGO სისტემა, რომელიც თავს მოახვიეს განსაკუთრებით განვითარებად ქვეყნებს, არის ყველაზე დიდი ბოროტება, რაც კი დასავლეთმა შექმნა აღმოსავლეთ ევროპის ახალი დემოკრატიის ქვეყნებში, - ამის შესახებ პარლამენტის თავმჯდომარემ, შალვა პაპუაშვილმა განაცხადა.
პაპუაშვილი გამოეხმაურა ილონ მასკს რომლის თქმითაც, „არასამთავრობო ორგანიზაციების ბიუროკრატია აკონტროლებს ევროპას, რაც მოსახლეობას დემოკრატიას ართმევს“.
„ეს ძალიან მნიშვნელოვანი განცხადებაა სწორედ იმიტომ, რომ ამერიკის დღევანდელი ადმინისტრაციის მხარდამჭერისგან მოდის. ამ განცხადებამ ამ საკითხის განხილვას კიდევ ერთი ბიძგი უნდა მისცეს და წერტილი უნდა დაუსვას იმ დამოკიდებულებას, რაც ათწლეულების განმავლობაში ჩამოყალიბდა. ამერიკის უსაფრთხოების სტრატეგიაში აღნიშნულია, რომ ევროპის ქვეყნები უმცირესობების მთავრობა იქცნენ. წლების განმავლობაში თავს გვახვევდნენ და მცდელობა იყო, რომ ვითარება ისე წარმოეჩინათ, რომ „ენჯეოები“, რომლებიც მათივე შექმნილი და დაფინანსებული არიან, არიან საზოგადოება. ფაქტობრივად, ჩვენ თვალწინ ცდილობდნენ, ხალხი „ენჯეოებით“ ჩაენაცვლებინათ. ისინი არც არავის მიერ არიან არჩეული, ლეგიტიმირებული და არც არავის წარმოადგენენ. ოცკაციანი „ისფედი“, 30-კაციანი „გამჭვირვალობა“, თუ 50-კაციანი „საია“, საკუთარი თავისა და დონორის გარდა, არავის წარმოადგენენ. „ენჯეო“ სისტემა თავს მოახვიეს განსაკუთრებით განვითარებად ქვეყნებს, რადგან მათ ქვეყნებში „ენჯეოების“ ასეთი სისტემა არ არის. ეს ყველაზე დიდი ბოროტებაა, რაც კი დასავლეთმა შექმნა აღმოსავლეთ ევროპის ახალი დემოკრატიის ქვეყნებში. ეს არის ყველაზე დიდი ბოროტება, რადგან ეს იყო მცდელობა, საზოგადოება ჩაენაცვლებინათ მათ მიერ კონტროლირებადი, მათი ინტერესების გამტარებელი მცირე ლობისტური ჯგუფებით. ილონ მასკი ამაზე საუბრობს, როცა ამბობს, რომ დღეს ევროპას NGO მართავს.
ამაზე ვსაუბრობდით და მნიშვნელოვანია, რომ ეს ხმა დღეს ამერიკიდან გაისმა. ის ოპერაცია, რაც წლების განმავლობაში ტარდებოდა, როცა მცდელობა იყო, რომ ხალხი „ენჯეოებით“ ჩაენაცვლებინათ, ეს ოპერაცია საბოლოოდ იქნა მხილებული, მათ შორის ამერიკის მხრიდან და დაფინანსებაც იმიტომ ჩახსნეს, რომ ეს იყო გამტარებელი სხვა ქვეყნის ინტერესების საზოგადოების საპირწონედ. ადვოკატთა ასოციაციის არჩევნები ტარდება. ასეთი ასოციაციები ან პროფკავშირები, ასეთი სახის წარმომადგენლობა უნდა იყოს. ადვოკატებს თავიანთი წარმომადგენელი ჰყავთ და ვის წარმოადგენს „ისფედი“ და „თიარი“? ვხედავთ, ვინც არიან, სად სხედან, რომელ პარლამენტებში აძლევენ ჩვენებას და ვის წინააღმდეგ. ეს ყველაფერი მხილებაა. ესტონეთში არიან დარეგისტირებული და იქიდან რომ ალაგებენ შავი ფულის შემოტანის სქემებს, ეს ყველაფერი ამის მხილებაა. ილონ მასკი რასაც ამბობს, ის არის, რომ „ენჯეო“ სისტემა თუ კულტურა ყველაზე დიდი ბოროტებაა, რაც კი დასავლეთმა შექმნა“, – განაცხადა პაპუაშვილმა.
