იურიდიულ საკითხთა კომიტეტის თავმჯდომარე არჩილ გორდულაძის თქმით, აქციების კანონის კიდევ უფრო გამკაცრების შემდეგ, ყველა კონკრეტულ შემთხვევაში, ადამიანებმა შსს-ს უნდა მიმართონ და უთხრან, რამდენი ადამიანი აპირებს აქციაზე მისვლას.
"ყოველ კონკრეტულ შემთხვევაში, პირებმა შინაგან საქმეთა სამინისტროს უნდა მიმართონ და უთხრან ადამიანების კონრეტული რაოდენობა - უნდა უთხრან, რამდენი ადამიანი აპირებს შეკრება/მანიფესტაციაში მონაწილეობას, ორგანიზატორი ვინ არის, რა ადგილზე და რა დროით იმართება. ყოველ კონკრეტულ შემთხვევაზე შსს იმსჯელებს, იმ დროს იმ ადგილზე აქციის გამართვის შემთხვევაში სხვების უფლებები შეიზღუდება თუ არა.
როცა აქცია 1 წლის განმავლობაში იმართება, თუ ეს ვინმეს სპონტანური ჰგონია, მაშინ პრობლემა ქართულის გაგებასთან გვაქვს. სპონტანური აქცია ნიშნავს, რომ რაღაც მოვლენა მოხდა და შესაბამისად, ხალხი გამოვიდა და სპონტანურად მიიღო გადაწყვეტილება, რომ საკუთარი აზრი დააფიქსიროს. მაგრამ, მაშინ, როცა არსებობს სპეციალური ჯგუფები და არსებობენ სპეციალური ადამიანები, რომლებიც განსაზღვრავენ, კონკრეტულ დღეს ვინ რომელ აქციაზე მივიდეს, ე.წ. გეგმები აქვთ, მორიგეობებს აწესებენ და ერთად განსაზღვრავენ, თუ რა ადგილზე, რა დროს და რა მიმართულებით იარონ, ეს სპონტანური აქცია არაა. წინასწარ დაორგანიზებული, მართული აქციაა სპონტანური არაა". - თქვა არჩილ გორდულაძემ ჟურნალისტებთან საუბრისას.
პარლამენტის იურიდიულ საკითხთა კომიტეტმა პირველი მოსმენით განიხილა და მხარი დაუჭირა პროექტს, რომლის მიხედვით, დგინდება შს სამინისტროს წინასწარი გაფრთხილების ვალდებულება იმ შემთხვევაში, თუ შეკრება ან მანიფესტაცია ხალხის სამოძრაო ადგილას იმართება. ამასთან ერთად, სატრანსპორტო გზის გადაკეტვის ანალოგიურად, დაუშვებელი ხდება ხალხის სავალი ნაწილის ხელოვნურად გადაკეტვა, თუ ამას შეკრება-მანიფესტაციის მონაწილეთა რაოდენობა არ მოითხოვს. ასევე, დაუშვებელი იქნება ხალხის სავალი ნაწილის სხვადასხვა კონსტრუქციებით და საგნებით გადაკეტვა.
სპონტანური ან არასპონტანური შეკრებისა და მანიფესტაციის ორგანიზატორს დაეკისრება ვალდებულება, შეკრებისა ან მანიფესტაციის თაობაზე მუნიციპალიტეტის ორგანოს ნაცვლად, შინაგან საქმეთა სამინისტრო გააფრთხილოს. გაფრთხილების მიღების შემდეგ, შინაგან საქმეთა სამინისტროს მიენიჭება უფლებამოსილება, შეკრებისა ან მანიფესტაციის ორგანიზატორებს შესთავაზოს შეკრების ჩატარების ადგილისა და სვლა-გეზის ცვლილება იმ შემთხვევაში, თუ ჩათვლის, რომ შეთავაზებული შეკრების ფორმა, ჩატარების ადგილი ან სვლა-გეზი საფრთხეს უქმნის საზოგადოებრივ წესრიგს, სახელმწიფოსა და საზოგადოებრივ ორგანოებს, საწარმოებს, დაწესებულებებისა და ორგანიზაციების ან/და ტრანსპორტის ნორმალურ მუშაობას, ასევე ხალხის შეუფერხებელ გადაადგილებას და ადამიანის უფლებებსა და თავისუფლებას.
თუ სპონტანური ან არასპონტანური შეკრების მონაწილეების შინაგან საქმეთა სამინისტროს მიერ მათთვის შეთავაზებულ ადგილზე ან სვლა-გეზზე შეკრების ან მანიფესტაციის ჩატარებას არ დათანხმდებიან და შეკრება ან მანიფესტაციას მაინც იმ ადგილას ჩაატარებენ, შეკრების ან მანიფესტაციის მონაწილეს დაეკისრება ადმინისტრაციული პატიმრობა 15 დღემდე ვადით, ხოლო ორგანიზატორს 20 დღემდე ვადით.
ანალოგიური ქმედების განმეორებით ჩადენისთვის მონაწილეს ან ორგანიზატორს სისხლის სამართლებრივი პასუხისმგებლობა დაეკისრება სსკ 347-ე მუხლით, კერძოდ, თავისუფლების აღკვეთა ერთ წლამდე ვადით.
