The Hill-ის ინფორმაციით, აშშ-ის სენატის უმრავლესობის ლიდერმა ჯონ ტუნიმ, ეროვნული თავდაცვის ავტორიზაციის აქტში „MEGOBARI აქტის“ დამატების შესახებ წარმომადგენელთა პალატის სპიკერის მაიკ ჯონსონის თხოვნა დაბლოკა
გამოცემის ორი წყაროს თანახმად, მაიკ ჯონსონს სურდა, „MEGOBARI აქტის“ სახელით ცნობილი კანონი დამატებოდა აშშ-ის „ეროვნული თავდაცვის ავტორიზაციის აქტს“, რომელსაც ფართო მხარდაჭერა აქვს როგორც წარმომადგენელთა პალატაში, ისე სენატში.
ტუნიმ, სენატორ მაკუეინ მალინის მოთხოვნით თავდაცვის კანონპროექტში "MEGOBARI აქტის" ჩართვაზე უარი სექტემბერშიც თქვა.
The Hill-ი წერს, რომ „MEGOBARI აქტის“ მხარდასაჭერად ჯონსონის ჩარევა მოულოდნელი იყო.
„ვფიქრობდით, რომ კანონპროექტი მკვდარი იყო, მას შემდეგ რაც ტუნიმ იგი სექტემბერში დაბლოკა. ვცადეთ, რომ კანონპროექტი სპიკერის თხოვნით ბოლო წამს NDAA-ში შეგვეტანა, თუმცა ტუნის წინააღმდეგობა ვერ დავძლიეთ“, - განუცხადა გამოცემას წყარომ.
წყაროების თქმით, ჯონსონი 21 ნოემბრის შემდეგ ცდილობდა, რომ თანაშემწეები მხარდაჭერისთვის „რესპუბლიკელებსა“ და „დემოკრატებს“ დაკავშირებოდნენ, რათა „MEGOBARI აქტის“ NDAA-ში დამატება მომხდარიყო.
