ფინეთის საგარეო საქმეთა მინისტრმა და ეუთო-ს ამჟამინდელმა თავმჯდომარემ, ელინა ვალტონენმა, მწვავედ გააკრიტიკა აშშ-ის ახალი „სამშვიდობო გეგმა“, რომლის შესახებაც ინფორმაცია საერთაშორისო მედიაში გავრცელდა.
ელინა ვალტონენმა აღნიშნა, რომ თუ აშშ-ის „სამშვიდობო გეგმა“ ისეთია, როგორიც მედიაშია აღწერილი, ასეთი პირობები მიუღებელი იქნება როგორც უკრაინისთვის, ასევე მისი ევროპელი პარტნიორებისთვის.
„ის [გეგმა] ისე გამოიყურება, თითქოს მოსკოვში დაიწერა. ძალიან ნათლად უარყოფს გაერო-ს ქარტიას“, - თქვა ვალტონენმა.
„ჩვენ გვსურს სამართლიანი და მდგრადი მშვიდობა უკრაინაში. და ამ მიზნის მისაღწევად უკვე ოთხი წელია ვმუშაობთ“, - დასძინა მან.
შეგახსენებთ, მედიამ გაავრცელა ინფორმაცია, რომ შეერთებული შტატების პრეზიდენტ დონალდ ტრამპის ადმინისტრაცია საიდუმლო მოლაპარაკებებს აწარმოებს რუსეთის ხელისუფლებასთან უკრაინაში ომის დასრულების ახალ გეგმაზე. შეერთებული შტატები, „სამშვიდობო გეგმის“ ფარგლებში, მოუწოდებს უკრაინას, რუსეთის ომის დასასრულებლად დათანხმდეს გარკვეული ტერიტორიებისა და იარაღის ნაწილის დათმობას.
