შინაგან საქმეთა მინისტრის მოადგილე, ალექსანდრე დარახველიძე საქართველოსა და ევროკავშირს შორის ადამიანის უფლებათა დაცვაზე ყოველწლიური დიალოგის შეხვედრის გაუქმებას გამოეხმაურა. დარახველიძე ამბობს, რომ შეხვედრა ევროკავშირმა "გაუგებარი მიზეზით" გადადო.
"ადამიანის უფლებების დაცვის საკითხებთან დაკავშირებით კონკრეტული დიალოგი იყო დაგეგმილი. სანქცირებაზე საუბარი უადგილოა. მათ კონკრეტული საკითხები მოგვაწოდეს, რაზეც საუბარი უნდა ყოფილიყო. შესაბამისად, განისაზღვრა უწყებები, რომლებიც მათ მიერ დასმულ კითხვებზე ამომწურავ, ფაქტებსა და მტკიცებულებებზე დაფუძნებულ პასუხებს გასცემდნენ.
სამწუხაროდ, როგორც ჩვენთვის ცნობილია, მათ ამ პასუხების მოსმენა თავად აღარ ისურვეს, შესაბამისად, ეს დიალოგი გადაიდო. როცა კონკრეტული დიალოგისთვის მზაობა იქნება, საქართველოს მთავრობა და თითოეული ის წარმომადგენელი, ვინც ამ დიალოგს დაესწრება, პასუხს გასცემს ყველა იმ კითხვაზე, რაც მათ აქვთ. გაუგებარია, ეს გადაწყვეტილება რა მიზეზით მიიღეს. მათ არაფერი აუხსნიათ". - თქვა დარახველიძემ ჟურნალისტებთან საუბარში.
ჟურნალისტის შეკითხვაზე, იყო თუ არა დიალოგის გადადების ის, რომ „ქართული ოცნება“ დელეგაციაში სანქცირებული პირის, კერძოდ კი უშუალოდ ალექსანდრე დარახველიძის ჩასმას აპირებდა, შს მინისტრის მოადგილე აცხადებს, რომ ევროკავშირის მიერ საქართველოს არცერთი მოქალაქე არ არის საინქციებული, შესაბამისად, ეს მოსაზრება ყოველგვარ რეალობას სცდება. მისი თქმით, ასეთი მიზეზი ოფიციალურად მათთვის არავის დაუსახელებია.
რაც შეეხება სანქცირების საკითხს, ევროკავშირის მიერ საქართველოს არცერთი მოქალაქე არ არის სანქციებული, შესაბამისად, ეს მოსაზრება ყოველგვარ რეალობას სცდება. საქართველოს მხარე განსაზღვრავს დელეგაციის შემადგენლობას იმ საკითხების მიხედვით, რა საკითხებიც სწორედ მათი მხრიდან იქნება დასმული. საქართველოს დელეგაციას განსაზღვრავს საქართველოს მხარე და გასცემს პასუხს იმ კითხვაზე, რაც გააჩნიათ ევროკავშირის შესაბამის წარმომადგენლებს“, - განაცხადა ალექსანდრე დარახველიძემ.
