"ხუთი წუთი ავტოკრატიამდე - როგორ გადაუხვია საქართველომ დასავლური გზიდან", - ამ სათაურით აქვეყნებს სტატიას სააგენტო Reuters-ი საქართველოში მიმდინარე მოვლენების შესახებ.
როგორც Reuters-ი წერს, სულ რაღაც ერთი წლის წინ საქართველოს პარლამენტში მანდატების მოსაპოვებლად ოპოზიციური კოალიციების მრავალფეროვანი სპექტრი იბრძოდა, დღეს კი 8 ოპოზიციური ლიდერიდან თითქმის ყველა ციხეში ან დევნილობაშია ან სისხლის სამართლის ბრალდებები ემუქრება. მმართველი პარტია კი სამი ძირითადი ოპოზიციური პარტიის სრულ აკრძალვას გეგმავს.
"ერთპარტიული მმართველობისკენ გადახრამ შოკი გამოიწვია სამხრეთ კავკასიის 3.7-მილიონიანი ქვეყნის ბევრ მოქალაქში. საბჭოთა კავშირის დაშლის შემდეგ, საქართველო განვითარებადი დემოკრატიის შთაბეჭდილებას ტოვებდა, რომელიც სწრაფად მიიწევდა ევროავშირში გაწევრიანებისკენ და რუსეთის ორბიტიდან თავის დაღწევას ცდილობდა", - ნათქვამია სტატიაში.
თუმცა, როგორც Reuters-ი წერს, ბრიუსელის შეფასებით, რომელიც საქართველოს დემოკრატიულ ინსტიტუტებს დასუსტებულად და სასამართლოს კი სახელმწიფოს გავლენის ქვეშ მყოფად მიიჩნევს, ახლა ქვეყანა ახლა დასავლეთისგან უფრო შორსაა, ვიდრე მისი პოსტსაბჭოთა ისტორიის რომელიმე დროს.
ამ თვეში, ევროკავშირმა ანგარიში გამოაქვეყნა, სადაც აცხადებს, რომ ახლა საქართველო მხოლოდ ფორმალურადაა წევრობის კანდიდატი ქვეყანა. საქართველოში ევროკავშირის ელჩის განცხადებით, კი საქართველო აღარ ადგას გაერთიანების წევრობის ტრაექტორიას.
Reuters-ის ინფორმაციით, ქართული პოლიტიკის და დიპლომატიის გამოცდილმა ვეტერანებმა, რომლებიც გამოცემას საქართველოში ბოლო თვეების განმავლობაში მიმდინარე მოვლენებზე ესაუბრნენ, განაცხადეს, რომ ახლა საქართველო იმ ზღვარზეა, რომლის მიღმაც დემოკრატიის აღდგენა რთული იქნება.
"ახლა ხუთი წუთი გვაშორებს ერთპარტიულ დიქტატურამდე", - უთხრა Reuters-ს საქართველოს საგარეო საქმეთა მინისტრის ყოფილმა მოადგილემ სერგი კაპანაძემ.
გამოცემა ასევე ესაუბრა ევროკავშირში საქართველოს ყოფილ ელჩს ნატალია საბანაძეს. როგორც საბანაძე ამბობს, ათწლეულების განმავლობაში, ხშირად მწვავე საშინაო პოლიტიკური დავების მიუხედავად, ყოველთვის არსებობდა პოლიტიკური კონსენსუსი, რომ საქართველო დასავლეთს ეკუთვნოდა. მისი თქმით, ეს კონსენსუსი ახლა დაკარგულია.
"მათ იციან, რომ დემოკრატიზაცია, რასაც ევროკავშირი ითხოვს, ნიშნავს იმის მიღებას, რომ რაღაც მომენტში ძალაუფლებას დაკარგავენ", – თქვა მან მმართველი პარტიის, "ქართული ოცნების" შესახებ. "მათ ეს არ უნდათ. და ისინი ფაქტობრივად სრულფასოვან ავტორიტარულ რეჟიმს აშენებენ".
როგორც Reuters-ი წერს, ოპონენტები ავტორიტარული ცვლილების ავტორად "ქართული ოცნების" მილიარდერ დამფუძნებელს, ბიძინა ივანიშვილს ასახელებენ.
გამოცემა ასევე ესაუბრა "ქართული ოცნების" წარმომადგენელს, ნინო წილოსანს.
"საქართველო მშვიდობის კუნძულია ძალიან რთულ გეოპოლიტიკურ რეგიონში", – თქვა ნინო წილოსანმა, "ინვესტორებს და ბიზნესებს კი სტაბილურობა სჭირდებათ".
სტატიაში აღნიშნულია, რომ საქართველოს, თავისი სტრატეგიული გეოგრაფიული მდებარეობის გათვალისწინებით, თეორიულად, შეუძლია, დიდი როლი ითამაშოს დასავლეთის მცდელობაში, მოახდინოს ენერგეტიკული და სავაჭრო მარშრუტების დივერსიფიკაცია რუსეთისგან მოშორებით.
"ეთნიკური კონფლიქტისა და ეკონომიკური კოლაფსის შემდეგ, რაც 1990-იან წლებში საბჭოთა კავშირის დაშლას მოჰყვა, საქართველომ განიცადა სწრაფი ზრდა, რაც გამოწვეული იყო ინვესტორებისთვის ხელსაყრელი პოლიტიკით, რასაც თან ახლდა მისი პოლიტიკური მიმართულება დასავლეთისკენ.
ეს ღიაობა ახლა სწრაფად შეიცვალა, რადგან ბოლო ორი წლის განმავლობაში უცხოური პირდაპირი ინვესტიციები დაეცა იმ დონემდე, რაც ბოლოს 2000-იანი წლების დასაწყისში იყო.
ეკონომიკური ზრდა შენარჩუნებულია, რადგან რუსული ბიზნესებისა და IT სპეციალისტების ნაკადი საქართველოში უკრაინის ომის დაწყების შემდეგ, ეკონომიკისთვის სარგებლის მომტანი აღმოჩნდა. მსოფლიო ბანკი საქართველოს მშპ-ის ზრდას წელს 7%-ით პროგნოზირებს, შარშანდელი 9.4%-ის შემდეგ.
შავ ზღვაზე ღრმაწყლოვანი პორტის მშენებლობა - პოტენციურად მნიშვნელოვანი სატრანზიტო ჰაბი, რომელიც აზიას ევროპასთან აკავშირებს - დიდწილად შეჩერდა მას შემდეგ, რაც კონსორციუმი, რომელსაც დასავლეთი ხელმძღვანელობს, პროექტიდან გააძევეს. ამის შემდეგ კონტრაქტი ჩინურმა კომპანიამ მოიგო, თუმცა პორტის მშენებლობის პროგრესი მინიმალურია", - აღნიშნულია სტატიაში.
როგორც Reuters-ი წერს, საქართველო ახლა ნავთობის დაახლოებით 45%-ის იმპორტს რუსეთიდან ახორციელებს. ეს მაჩვენებელი 2012 წელს სულ რაღაც 8% იყო. თუმცა თბილისსა და მოსკოვს დიპლომატიური ურთიერთობა არ აქვთ.
"ბოლო კვირების განმავლობაში, "ქართულმა ოცნებამ" არაერთი ზომა მიიღო, რათა პოლიტიკურად განსხვავებული აზრი აღკვეთოს. საკონსტიტუციო სასამართლოში შეტანილი სარჩელი სამი მთავარი ოპოზიციური პარტიის საქმიანობას აკრძალავს, ხოლო ცხრა ძირითადი ოპოზიციური ფიგურის, მათ შორის ყოფილი პრეზიდენტის, მიხეილ სააკაშვილის წინააღმდეგ ახალი სისხლის სამართლის ბრალდებები, ნებისმიერ პოტენციურ ოპონენტს წლების განმავლობაში საპატიმროში დატოვებს.
ბოლო დროს რეპრესიები თავად მმართველ პარტიასთან დაახლოებულ ფიგურებზეც გავრცელდა, სისხლის სამართლის ბრალდებები წაუყენეს მაღალი რანგის მინისტრებსა და „ქართული ოცნების“ დამფუძნებლის, ივანიშვილის ყოფილ მთავარ მოკავშირეებს", - აღნიშნულია სტატიაში.
როგორც Reuters-ი წერს, პარლამენტის წინ ღამის ანტისამთავრობო საპროტესტო აქციებზე დაკავებები პოლიტიკურ აქტივისტებს შიშის და სასოწარკვეთის მდგომარეობაში აყენებს. ათობით ადამიანი ციხეში იმყოფება ან დაჯარიმებული გზის გადაკეტვის გამო.
"საქართველო უბრალოდ გაქრა, არა მხოლოდ ევროპული მაგიდიდან, არამედ გლობალური სცენიდანაც", – თქვა გრიგოლ გეგელიამ პარტია "ლელოდან", რომელსაც აკრძალვა ემუქრება. "ჩვენ ვკარგავთ ჩვენს ქვეყანას".
