"ნაციონალური მოძრაობის" თავმჯდომარე, თინა ბოკუჩავა სტამბოლში ეუთო-ს საპარლამენტო ასამბლეას ესწრება, სადაც ცოტა ხნის წინ საქართველოზე საგანგებო რეზოლუცია მიიღეს.
ბოკუჩავას თქმით, ევროპის სახალხო პარტიის და თანამოაზრეთა ჯგუფის რეზოლუცია მოუწოდებს წევრ სახელმწიფოებს იმგვარი ინსტრუმენტის გამოყენებისკენ, "რაც ივანიშვილის რეჟიმს ფინანსურად შეზღუდავს".
„ეუთო-ს საპარლამენტო ასამბლეაში, ევროპის სახალხო პარტიამ და თანამოაზრე პოლიტიკურმა ჯგუფმა, რომელიც ყველაზე დიდი და გავლენიანი პოლიტიკური ჯგუფია, მიიღო საგანგებო რეზოლუცია საქართველოზე. რეზოლუციაში საუბარია ივანიშვილის რეჟიმის მხრიდან ავტორიტარულ ნაბიჯებზე, რომელიც აღწერს იმ პოლიტიკურ რეპრესიებს, რომელსაც ადგილი აქვს ქვეყანაში. ასევე მოუწოდებს საერთაშორისო პარტნიორებს ყველა საერთაშორისო ინსტრუმენტის გამოყენებისკენ, მათ შორის იმგვარი კონკრეტული ინსტრუმენტების, რომელიც ივანიშვილის რეჟიმს, მის რეპრესიულ მანქანას ფინანსურად შეზღუდავს და დააწესებს კონკრეტულ შეზღუდვებს იმისთვის, რომ საქართველოში დიქტატურის კონსოლიდაციისთვის კორუფციული ფულის გამოყენება არ ხდებოდეს“,- განაცხადა თინა ბოკუჩავამ.
