სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმახელიძემ სასჯელაღსრულების დაწესებულებაში გრძელვადიანი პამნების შესახებ კანონპროექტი წარადგინა.

"2010 წლის 1-ელ ოქტომბერს მიღებულ პატიმრების შესახებ კოდექსში პირველად გაჩნდა ცნება გრძელვადიანი პაემნები, რომელიც 2012 წლისთვის იყო გათვალისწინებული მხოლოდ არასრულწლოვანთა დაწესებულებაში. თუმცა იმის გათვალისწინებით, რომ ჩვენ ძალიან დიდ მნიშვნელობას ვანიჭებთ პატიმრების რესოციალიზაციას, გადავწყვიტეთ ვადა გადმოგვეწია და მათ უკვე საშუალება მიეცემა მიმდინარე წლის 1-ლი მარტიდან გრძელვადიანი პაემანი განახორციელონ მშობლებთან, მეუღლესთან, შვილებთან და შვილად ამყვანთან", - აღნიშნა კალმახელიძემ დღევანდელ პლენარულ სხდომაზე.

მინისტრის თქმით, სასჯელაღსრულების დაწესებულებებში გრძელვადიანი პაემნის ღირებულება 60 ლარს შეადგენს და ეს არის ის მინიმალური საფასური, რომელიც პატიმრისა და მისი სტუმრის მომსახურებისთვის არის განკუთვნილი.

მინისტრის განმარტებით, გრძელვადიანი პაემნის ხანგრძლივობა 24 საათს შეადგენს, რაც შეეხება ინფრასტრუქტურას, კალმახელიძის თქმით, გრძელვადიანი პაემნებისთვის აშენდა 3-ვარსკვლავიანი ტიპის სასტუმროები, სადაც პატიმრებს და მის სტუმრებს მაღალ დონეზე მოემსახურებიან. ექნებათ სამჯერადი კვება, ხოლო მცირეწლოვანი ბავშვებისთვის მოეწყობა სათამაშო მოედნები. ამასთან გრძელვადიანი პაემნებისთვის აშენებულ შენობებს ექნებათ ეზო.

პატიმრებს გრძელვადიანი პაემნებით სარგებლობა წელიწადში ორჯერ, ხოლო წახალისების მიზნით სამჯერ, ხოლო არასრულწლოვნებს 3 ჯერ და წახალისების მიზნით 4 ჯერ შეეძლებათ. თუმცა ის პატიმრები, ვინც იმყოფებიან საკარანტინო რეჟიმში სადისციპლინო ან ადმინსტრაციული სასჯელი აქვთ დაკისრებული, მათ გრძელვადიანი პაემნის უფლება არ მიეცემათ. ამ დროისთვის გრძელვადიანი პაემნებისთვის განკუთვნილი ინფრასტრუქტურის მშენებლობა უკვე დასრულებულია არასრულწლოვანთა მე- 11 სასჯელაღსრულებს დაწესებულებაში, ასევე რუსთავის მე-6 საპყრობილეში, რომელთაც სამუდამო პატიმრობა აქვთ მისჯილი და ასევე რუსთავის მე-16 დაწესებულებაში.

რაც შეეხება დანარჩენ სასჯელაღსრულების დაწესებულებებში გრძელვადიანი პაემნებისთვის ინფრასტრუქტურის მშენებლობას ის 2012 წლისთვის დასრულდება.