საპარლამენტო უმრავლესობის წევრმა დავით დარჩიაშვილმა საქართველოს თავისუფლებისთვის ბრძოლაში დაღუპულ მეომრების ფოტოების ნაგვის ურნაში შესაძლო აღმოჩენის ფაქტთან დაკავშირებით მოკვლევის დაწყებას მხარს უჭერს.
როგორც დღევანდელ პლენარულ სხდომაზე დარჩიაშვილმა აღნიშნა, იმის თქმა, რომ თავდაცვის სამინისტრო პატივს არ სცემს ბრძოლაში დაღუპულების ხსოვნას სიმართლეს არ შეესაბამება, მაგრამ დეპუტატი არ გამორიცხავს, რომ აღნიშნულ ფაქტს ადგილი ჰქონოდა ვინმეს უყურადღებობის გამო.
"ვეტერანების ყველა პატივს სცემს და მათ სოციალური მდგომარეობის გასაუმჯობესებლად ყველაფერი კეთდება, მაგრამ დღეს თავდაცვის სამინისტრო ურთულესი პროცესით არის დაკავებული და ეს არის ისეთი მნიშვნელოვანი საკითხი, როგორიც არის შეიარაღებული ძალების აღჭურვა და მოდერნიზაცია. ამ დროს კი შესაძლებელია ვინმეს უყურადღებობის გამო ეს ფაქტი მომხდარიყო. ამიტომ საკითხის მოკვლევა შესაძლებელია მართლაც დაიწყოს, თუმცა ეს არ უნდა გახდეს პოლიტიკური პოპულიზმის საგანი", - აღნიშნა დარჩიაშვილმა.
რაც შეეხება ვეტერანების საკითხს, დეპუტატის თქმით, 90-იან წლებში ისეთი ამბები ხდებოდა, რომ დღეს ვისაც ვეტერანის სტატუსი აქვს მინიჭებული ზოგიერთ მათგანს საბრძოლო მოქმედებაში მონაწილეობა საერთოდა არ მიუღია და ეს საკითხიც უნდა გადაისინჯოს.
