საქართველოს მთავრობაში მორიგი სტრუქტურული რეორგანიზაცია იგეგმება. როგორც დღეს მთავრობის სხდომაზე საქართველოს პრემიერ-მინისტრმა ნიკა გილაურმა განაცხადა, მან შეასრულა პრეზიდენტის დავალება და გარემოს დაცვისა და ბუნებრივი რესურსების სამინისტროს რეორგანიზაციის გეგმის რამდენიმე ვარიანტი მოამზადა.
როგორც გილაურმა მთავრობის სხდომაზე აღნიშნა, გარემოს დაცვისა და ბუნებრივი რესურსების სამინისტროდან გარემოს დაცვა და ეკოლოგია ამავე სამინისტროში დარჩება, ხოლო ბუნებრივი რესურსები და ლიცენზირება ენერგეტიკის სამინისტროს შეუერთდება. როგორც პრემიერ-მინისტრმა განაცხადა ამ რეფორმით კი ენერგეტიკის სამინისტროს პროფილი მნიშვნელოვნად იცვლება და ენერგეტიკის სამინისტროს ბუნებრივი რესურსებისა და ენერგეტიკის სამინისტრო დაერქმევა. იმავდროულად ეკონომიკისა და მდგრადი განვითარების სამინისტროში არსებული ლიცენზირების დეპარტამენტი სამინისტროს გამოეყოფა და ის ენერგეტიკის სამინისტროს შეუერთდება. ასევე ბუნებრივი რესურსებისა და გარემოს დაცვის სამინისტროს საქვეუწყებო დაწესებულება დაცული ტერიტორიების სააგენტო სამინისტროს გამოეყოფა და ეკონომიკისა და მდგრადი განვითარების სამინისტროს სსიპ-ის სახით შეუერთდება.
"მოგეხსენებათ, რამდენიმე კვირის უკან პრეზიდენტმა დამავალა განმეხილა სხვადასხვა ვარიანტი თუ როგორ შეიძლება მომხდარიყო გარემოს დაცვისა და ბუნებრივი რესურსების სამინისტროს რეორგანიზაცია. მე ვიმუშავე როგორც გოგა ხაჩიძესთან, ასევე ეკონომიკისა და მდგრადი განვითარების სამინისტროსთან, ენერგეტიკის სამინისტროსთან და ფინანსთა სამინისტროსთან და რამდენიმე ვარიანტზე შევჯერდით, თუმცა ამ ვარიანტებს დღეს განვიხილავთ და შევეცდებით რომ საკანონმდებელო ინიციატივის სახით უახლოეს დღეებში პარლამენტში შევიტანოთ" - განაცხადა ნიკა გილაურმა.
პრემიერ-მინისტრის განმარტებით, რეორგანიზაციის თემასთან დაკავშირებით კონსულტაციები კვლავ გრძელდება და მას ანალოგიური კონსულტაცია დღეს დღის ბოლომდე აქვს ჩანიშნული. ნიკა გილაურის განმარტებით მთავრობა განიხილავს გარემოს დაცვის სამინისტროსთან მიმართებაში ორ ვარიანტს. კერძოდ, დღევანდელი გარემოს დაცვისა და ბუნებრივი რესურსების სამინისტრო შესაძლოა დარჩეს მხოლოდ გარემოს დაცვის სამინისტროდ ან გადაკეთდეს და ჩამოყალიბდეს სახელმწიფო მინისტრის აპარატად.