PACE-ს დელეგაციის წევრებს ჩემს კოლეგებთან ერთად შევხვდები, ეს არის მონიტორინგის კომიტეტი, ისინი სხვადასხვა მიმართულებით ქვეყანაში მიმდინარე პროცესებს აკვირდებიან და საკუთარ მოსაზრებებს დებენ, რამდენად შეესაბამება ამა თუ იმ პოლიტიკური აქტორის ქმედება ევროპის საბჭოს წინაშე აღებულ ვალდებულებებს, – ამის შესახებ „ქართული ოცნების“ წევრმა, ლევან მახაშვილმა განაცხადა.
მახაშვილის თქმით, მნიშვნელოვანია, რომ მათ მკაფიო და არაორაზროვანი დასკვნა დადონ, მათ შორის 4 ოქტომბრის მოვლენებთან დაკავშირებით, რადგან ეს ანგარიში არ მოიცავს მხოლოდ ხელისუფლების პასუხისმგებლობას ამა თუ იმ ქმედებაზე, არამედ საუბარია, ყველა პოლიტიკურ აქტორზე თუ სახელმწიფო ინსტიტუტზე.
„ანგარიშს ვნახავთ და შევაფასებთ. თუ იქ მკაფიოდ არ იქნება ასახული, როგორ აფასებენ 4 ოქტომბრის მოვლენებს და რადიკალური ჯგუფების პასუხისმგებლობას, ყველა სხვა ანგარიში ჩვენთვის მინიმუმ არაგულწრფელი და შეიძლება, უსამართლოც იყოს. თუ ობიექტური დამკვირვებელი ხარ, წინასწარ პოზიციებით ჩამოდიხარ და ამის აფიშირებას ახდენ, ბუნებრივია, ეს შენს ობიექტურობას თავიდან დიდი კითხვის ქვეშ აყენებს. ჩვენ ყველა თემაზე საუბარი გვექნება, რაც მათ აინტერესებთ და აუცილებლად შევეკითხებით, რაც ჩვენ გვაინტერესებს. რამდენადაც ვიცი, პარლამენტის თავმჯდომარე შეხვდება, როგორც პარლამენტის ხელმძღვანელი“, – განაცხადა მახაშვილმა.
PACE-ს დელეგაცია თბილისში შეხვედრებს მართავს. ამ დროისთვის ის სამოქალაქო სექტორს შეხვდა და ასევე, შეხვდერები მიმდინარეობს ოპოზიციასთან. დელეგაცია ხვალ „ქართული ოცნების“ წარმომადგენლებთან შეხვედრას გეგმავს.
