საქართველოს შინაგან საქმეთა მინისტრი გეკა გელაძე ბუდაპეშტში, ოფიციალური ვიზიტით, დელეგაციასთან ერთად, იმყოფება.
ვიზიტის ფარგლებში, მინისტრმა უნგრელ კოლეგასთან, შანდორ პინტერთან, ორმხრივ ფორმატში, შეხვედრა გამართა. მხარეებმა განიხილეს სამართალდაცვით
სფეროში არსებული თანამშრომლობის პრიორიტეტული მიმართულებები. განსაკუთრებული ყურადღება გამახვილდა მხარეთა შორის გამოცდილებისა და საუკეთესო პრაქტიკის გაზიარების კუთხით მიმდინარე და სამომავლო ღონისძიებებზე.
მხარეთა შეთანხმებით, უახლოეს მომავალში, შეიქმნება სპეციალური სამუშაო ჯგუფი, რომელიც უზრუნველყოფს ორ სახელმწიფოს შორის საპოლიციო თანამშრომლობის გაღრმავებას, კერძოდ მიგრაციის, ნარკოდანაშაულთან ბრძოლისა და პოლიციის აკადემიის საგანმანათლებლო პროგრამების მიმართულებით.
შეხვედრაზე ასევე ხაზი გაესვა საქართველოსა და უნგრეთს შორის არსებული მტკიცე მეგობრული ურთიერთობების მნიშვნელობას. ამასთან, ორი ქვეყნის შინაგან საქმეთა მინისტრებმა კიდევ ერთხელ გამოხატეს უწყებებს შორის თანამშრომლობის გაძლიერების მზაობა.
შეხვედრის დასასრულს, გეკა გელაძემ უნგრელ კოლეგას მადლობა გადაუხადა მასპინძლობისთვის და საპასუხო ვიზიტით საქართველოში მოიწვია.
ინფორმაციას შინაგან საქმეთა სამინისტროს პრესსამსახური ავრცელებს
