რამდენად უცნაურიც არ უნდა იყოს, თავად „ქართულ ოცნებას“ 13 წელი და 8 მინისტრი დასჭირდა იმისთვის, რომ მიმხვდარიყო, რომ თურმე ერთი წლით მეტს სწავლობენ საქართველოს მოსწავლეები სკოლაში - ამის შესახებ „ლელო - ძლიერი საქართველოს“ წევრმა თაზო დათუნაშვილმა პარტიის ოფისში გამართულ ბრიფინგზე განაცხადა.
მისი თქმით, ე.წ. რეფორმა, რომელიც თითქოს კეთილშობილურ მიზნებს ისახავს და განათლების ხარისხის ამაღლებას შეუწყობს ხელს ქვეყანაში, სინამდვილეში, მორიგი ფუნდამენტური საფრთხეა საქართველოს ცივილიზებული მომავლისთვის.
დათუნაშვილის თქმით, ასეთი მიდგომა ფაქტობრივად ანადგურებს განათლების სისტემის დამოუკიდებლობასა და ინოვაციურ განვითარებას.
ნონსენსია ეს რეფორმა. სინამდვილეში, ებრძვის ფუნდამენტშივე საქართველოს განათლების სისტემის სწორ გზაზე განვითარებას. ერთი, მეორე, ის, რასაც აპირებენ აკადემიურ სფეროში და უმაღლეს სასწავლებლებში, სინამდვილეში, ამ რაღაცა საბჭოთა ტიპის დაგეგმილი სისტემის, სადაც თრმე კობახიძემ უნდა გადაწყვიტოს, რომელი სახელმწიფო უნივერსიტეტები რა სპეციალობის უნდა იყოს, ერთ მშვენიერ დღეს, ერთი განცხადებით, საერთოდ უნდა ჩავრეცხოთ თურმე ამ ქვეყანაში აკადემიური თავისუფლების პრინციპი, - ამბობს თამაზ დათუნაშვილი.
