ხვალ, 7 თებერვალს, 11:00 საათზე ქალაქ ბათუმში, სასტუმრო „შერატონ მეტეხი პალასში" საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდებიან.
საქართველოს ბიზნეს ასოციაცია მსგავსი ფორმატისა და მასშტაბის შეხვედრას პირველად უკეთებს ორგანიზებას და მასში ბიზნესმენებთან ერთად მონაწილეობას მიიღებენ საქართველოს იუსტიციის მინისტრი - ზურაბ ადეიშვილი, საქართველოს ფინანსთა მინისტრი - კახა ბაინდურაშვილი, საქართველოს ეროვნული ბანკის პრეზიდენტი - გიორგი ქადაგიძე, საქართველოს მთავარი პროკურორი - მურთაზ ზოდელავა, იუსტიციის მინისტრის მოადგილეები - გიორგი ვაშაძე და ჯაბა ებანოიძე, შემოსავლების სამსახურის უფროსი - გიორგი ცხაკაია და ფინანსთა სამინისტროს საგამოძიებო სამსახურის უფროსი - გიორგი ობგაიძე და საქართველოს ბიზნეს ომბუდსმენი - გიორგი პერტაია.
შეხვედრა მიზნად ისახავს ბიზნესსა და სახელმწიფო ინსტიტუტებს შორის დიალოგს და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.
თავის მხრივ საქართველოს ბიზნეს ასოციაციის წევრებს შეხვედრაზე ექნებათ საშუალება არაფორმალურ გარემოში ისაუბრონ ხელისუფლების წარმომადგენლებთან მათთვის საინტერესო საკითხებზე და პრობლემებზე.