ევროპის საბჭოს საპარლამენტო ასამბლეა (PACE) საქართველოსთან დაკავშირებით რეზოლუციის პროექტს ავრცელებს. რეზოლუციის პროექტის ავტორები არიან ედიტე ესტრელა სოციალისტების, დემოკრატებისა და მწვანეთა ჯგუფიდან და საბინა ჩუდიჩი ლიბერალებისა და დემოკრატების ალიანსიდან.
რეზოლუციის პროექტში ნათქვამია, რომ საქართველოს ხელისუფლება სისტემატურად უგულებელყოფს საქართველოში დემოკრატიული კრიზისის შესახებ იმ რეკომენდაციებს, რომლებსაც საერთაშორისო საზოგადოება იზიარებს.
„ასამბლეა კიდევ ერთხელ გმობს საქართველოში ოპოზიციის წევრების, ჟურნალისტებისა და სამოქალაქო საზოგადოების წარმომადგენლების პოლიტიკური ნიშნით დევნას. ამ მხრივ ვგმობთ, ჟურნალისტ მზია ამაღლობელის და რამდენიმე ოპოზიციური პარტიის ლიდერის შეთხზული ბრალდებებით, პოლიტიკურად მოტივირებულ პატიმრობას. ასეთი დევნა მიზნად ისახავს, განსხვავებული აზრის ჩახშობას და ის დემოკრატიულ საზოგადოებასთან შეუთავსებელია“ – აღნიშნულია ევროპის საბჭოს საპარლამენტო ასამბლეის მიერ გამოქვეყნებულ რეზოლუციის პროექტში.
ამასთან, რეზოლუციის დოკუმენტში საქართველოში, 4 ოქტომბერს დაგეგმილ ადგილობრივ არჩევნებთან დაკავშირებითაც არის საუბარი.
„ასამბლეა წუხს იმ ფაქტის გამო, რომ მისი მოწოდება ახალი, ჭეშმარიტად დემოკრატიული არჩევნებისთვის ხელსაყრელი საარჩევნო გარემოს შესაქმნელად დაუყოვნებელი, ინკლუზიური პროცესის შესახებ არ შესრულდა. ეს აშკარაა ოპოზიციური პარტიების გადაწყვეტილებიდან, მომავალ ადგილობრივ არჩევნებში მონაწილეობა არ მიეღოთ. ასამბლეა ასევე წუხს, რომ ამ არჩევნებს სამოქალაქო საზოგადოების ორგანიზაციები, რომლებსაც არჩევნების დაკვირვების კუთხით კარგი რეპუტაცია აქვთ, სამოქალაქო საზოგადოების წინააღმდეგ განხორციელებული ზეწოლის გამო, არჩევნებს არ დააკვირდებიან. ასამბლეა გმობს, რომ საქართველოს ხელისუფლებამ ევროპის საბჭოს ადგილობრივი და რეგიონული ხელისუფლების კონგრესი არჩევნებზე დასაკვირვებლად არ მიიწვია. ასამბლეა მწუხარებას გამოთქვამს, რომ ევროპაში უსაფრთხოებისა და თანამშრომლობის ორგანიზაციის დემოკრატიული ინსტიტუტებისა და ადამიანის უფლებათა ოფისისადმი ამ არჩევნებზე დასაკვირვებლად მოწვევა დაგვიანებით განზრახ გაიგზავნა, რამაც მათი (OSCE/ODIHR) დაკვირვება შეუძლებელი გახადა,“ – ვკითხულობთ PACE-ს რეზოლუციის პროექტში.
რეზოლუციის პროექტის ტექსტი რამდენიმე პუნქტისგან შედგება და ის გმობს, საქართველოს ხელისუფლების მიერ ასამბლეასთან დიალოგის ნებისმიერი ფორმის უარყოფას და კანონმდებლობასთან დაკავშირებით მოსაზრებების მომზადებაში, კანონის მეშვეობით დემოკრატიის ევროპულ კომისიასთან (ვენეციის კომისია) თანამშრომლობაზე უარის თქმას.
ევროპის საბჭოს საპარლამენტო ასამბლეა ასევე შეშფოთებულია არასამთავრობო ორგანიზაციების წინააღმდეგ საქართველოს ხელისუფლების ქმედებებით. კერძოდ, საუბარია საკამათო „უცხოელი აგენტების რეგისტრაციის შესახებ“ კანონზე, რომელიც ასამბლეის თქმით, არასამთავრობო ორგანიზაციების სათანადო ფუნქციონირებას ხელს უშლის. PACE ასევე გმობს „უცხოური გავლენის გამჭვირვალობის შესახებ“ კანონს, რომელიც „ევროპულ სტანდარტებს არ აკმაყოფილებს“. ასევე, მწუხარებას გამოთქვამს „გრანტების შესახებ“ კანონის მიღების გამოც და მიიჩნევს, რომ აღნიშნული კანონების ეფექტი საქართველოს სამოქალაქო საზოგადოებისთვის გამანადგურებელია.
ევროპის საბჭოს საპარლამენტო ასამბლეა ასევე ღრმა შეშფოთებას გამოთქვამს, საპარლამენტო საგამოძიებო კომისიასთან დაკავშირებით, რომელიც „ერთიანი ნაციონალური მოძრაობის“ რეჟიმისა და მისი პოლიტიკური წარმომადგენლების 2003-2012 წლების საქმიანობას შეისწავლიდა. ასამბლეა კომისიის დასკვნას და საქართველოს პრემიერ-მინისტრის ბოლოდროინდელ განცხადებებსაც გმობს და თვლის, რომ დემოკრატიული ოპოზიციის აკრძალვა საქართველოში ერთპარტიულ დიქტატურას დაამყარებდა, რაც ევროპის საბჭოს წევრობასთან შეუთავსებელი იქნებოდა.
ცნობისთვის, ევროსაბჭოში საქართველოს საკითხზე დებატები ხვალ გაიმართება.
