საქართველოს პარლამენტი და საზოგადოებრივი მაუწყებელი ერთობლივ პროექტს განახორციელებენ, რომლის ფარგლებშიც დოკუმენტური ფილმების სერია შეიქმნება. როგორც კომისიის დღევანდელ სხდომაზე ითქვა, დოკუმენტურ ფილმებში გადმოცემული იქნება რუსეთის აგრესიული, იმპერიალისტური მოქმედებების შესახებ, როგორც საბჭოთა, ისე შემდგომ პერიოდში.
"ფართო საზოგადოებას საქართველოში და უცხოეთში უნდა გავაცნოთ, რა საფრთხეს უქმნის რუსული იმპერიალიზმი არა მარტო ყოფილ საბჭოთა რესპუბლიკებსა და აღმოსავლეთ ევროპას, არამედ ზოგადად მშვიდობასა და სტაბილურობას მთელ მსოფლიოში", - განაცხადა ტერიტორიული მთლიანობის აღდგენის საკითხთა დროებითი კომისიის თვმჯდომარე შოთა მალაშხიამ.
მისი თქმით, კომუნიზმი ისეთივე საშინელებაა, როგორც ფაშიზმი და ბევრი პარალელი არსებობს საბჭოთა კავშირის მიერ განხორციელებულ ოკუპაციებსა და დღევანდელი რუსეთის მიერ განხორციელებულ ანექსიას შორის.
"'მაგალითად, თუ საქართველოში აგვისტოს ომი იყო ხუთდღიანი, ბალტიისპირეთის რესპუბლიკების ოკუპაცია მიმდინარეობდა ოთხ, სამ, ერთ დღეს; ჩეხეთში _ დღე-ნახევარს, ავღანეთის ოკუპაცია იყო 43-წუთიანი რასაც 2 მილიონი ადამიანის მსხვერპლი მოჰყვა და ასეთი მაგალითების ჩამოთვლა მრავლად შეიძლება. ასე რომ, ბევრი თემა არსებობს დოკუმენტური ფილმებისთვის, რომლის საშუალებითაც საზოგადოება სიმართლეს გაიგებს რუსეთის მოქმედებების შესახებ", - აღნიშნა მან.
საზოგადოებრივი მაუწყებლის გენერალური დირექტორის, გია ჭანტურიას განცხადებით კი, ეს ფილმები იქნება ისეთი ხარისხის პროდუქცია, რომელიც დააკმაყოფილებს მსოფლიო სტანდარტებს, რომელიც გათვლილია არა მხოლოდ ქართველი მაყურებელზე, არამედ მისი ნახვის საშუალება მსოფლიოს მრავალ ქვეყანაში ექნებათ.
მისი ინფორმაციით, მასალა მუშავდება და გადაღებები უახლოეს დღეებში დაიწყება.
