კომპანია "დიდუბის მარკეტი" დიდუბეში ახალ სამაცივრე მეურნეობას ხსნის. მენეჯმენტი თანამედროვე სტანდარტების სამაცივრე მეურნეობას ექსპლუატაციაში პირველ აპრილს გაუშვებს, თუმცა მისი დატვირთვა ეტაპობრივად მარტიდან დაიწყება.
მენეჯმენტის ცნობით, ყველა პოტენციურ მოიჯარეს დარეგისტრირება უკვე 10 თებერვლიდან შეუძლია.
სამაცივრე მეურნეობა თანამედრივე სტანდარტებს აკმაყოფილებს, იგი აღჭურვილია ცნობილი იტალიური კომპანიის "ტექნო ბლოკი" დანადგარებით. სამაცივრე მეურნეობა 1500 კვ. მეტრის ფართზეა განთავსებული, თუმცა სრულად დამხმარე ტერიტორია 7000 კვ. მეტრს მოიცავს.
კომპანიის ხელმძღვანელის, ვანო იოსელიანის განმარტებით, სამაცივრე მეურნეობა გათვლილია როგორც ხორცპროდუქტებისა და თევზის, ასევე ხილ-ბოსტნეულის შესანახად.
მეურნეობის უპირატესობა ისაა, რომ "დიდუბის მარკეტის" მენეჯმენტი დაინტერესებულ კომპანიებსა და კერძო პირებს სავაჭრო ფართით სარგებლობის შესაძლებლობასაც აძლევს - ყოველ სამაცივრე საკანს საკუთარი სავაჭრო ფართი აქვს, რომლის გამოყენება მოიჯარისაგან დამატებითი საფასურის გადახდას არ მოითხოვს. საკანთან ერთად სავაჭრო ფართით სარგებლობა მცირე, საშუალო და მსხვილი კომპანიებისთვის დროისა და ფინანსების დაზოგვის შესაძლებლობას ქმნის.
გარდა ამისა, რომ თბილისში სამაცივრე ფართის დეფიციტია, დღეს მოქმედი ყველა სამაცივრე მეურნეობა თბილისის გარეუბნებშია და ხელმისაწვდომობაც შედარებით გართულებულია.
მენეჯმენტი განმარტავს, რომ სამაცივრე მეურნეობის მომსახურების ტარიფები ბაზარზე მოქმედ ფასებთან კონკურენტუნარიანი იქნება, მინიმალური ფართი მოიჯარისთვის 63 კვ. მეტრით განისაზღვრება.
მენეჯმენტს სამაცივრე მეურნეობის მოწყობა 1 მლნ აშშ დოლარი დაუჯდა. მომავალში იგეგმება მეურნეობის გაფართოება, რაზედაც კომპანია დამატებით 1 მლნ აშშ დოლარის ინვესტიციას განახორციელებს.
"დიდუბის მარკეტი" "საქინვესტის" შვილობილი კომპანიაა, რომელიც თავის მხრივ ჰოლდინგ "საქართველოს ინდუსტრიული ჯგუფის" შემადგენლობაში შედის.
