ქვეყნის საინვესტიციო და ტურისტული მიმზიდველობის ზრდა უცხოური ინვესტიციების ზრდის მნიშვნელოვანი წინაპირობაა, ამის შესახებ საქართველოს მთავრობის 2011-2014 წლების ქვეყნის ძირითადი მონაცემებისა და მიმართულებების დოკუმენტშია ნათქვამი. მთავრობის გათვლებით, უახლოესი სამი წლის განმავლობაში აუცილებელია საერთაშორისო დონეზე და ქვეყნის შიგნით ისეთი ღონისძიებების გატარება, რომლებიც ერთის მხრივ, უზრუნველყოფენ ქვეყანაში არსებული საინვესტიციო და ტურისტული შესაძლებლობების დემონსტრირებას, ხოლო მეორეს მხრივ, წარმოქმნის ახალ შესაძლებლობებს და ხელს შეუწყობს ინვესტიციების შემოდინებას ქვეყნის ეკონომიკის სხვადასხვა სექტორში.
ეკონომიკისა და მდგრადი განვითარების სამინისტროში მიიჩნევენ, რომ საქართველოს ტურისტული იმიჯის პოპულარიზაცია საერთაშორისო ბაზრებზე პირდაპირ გავლენას იქონიებს ამ ქვეყნებიდან ტურისტების რაოდენობის ზრდაზე. შედეგად მოხდება ტურისტული კომპანიების სტიმულირება აღნიშნულ ბაზრებზე საქმიანობის უფრო აქტიურად წარმართვისათვის. შიდა ტურიზმის განვითარება ხელს შეუწყობს საქართველოს ეფექტური პოზიციის დაკავებაში მიზნობრივ ტურისტულ ბაზრებზე. ქვეყანაში ტურიზმის განვითარებისათვის ძალზედ მნიშვნელოვანია ასევე ტურისტული ინფრასტრუქტურისა და ტურისტული ადგილების განვითარების ხელშეწყობა და ტურიზმის სფეროში მომსახურების ხარისხის გაუმჯობესება.
ქვეყნის საგარეო ვაჭრობის შემდგომი განვითარებისთვის და სავაჭრო სტრუქტურული გაუმჯობესებისთვის მნიშვნელოვანია საგარეო სავაჭრო ურთიერთობების რეგულარული ანალიზი და რეკომენდაციების შემუშავება. უცხოურ ბაზრებზე ტექნიკური ბარიერების დაძლევისათვის საჭიროა ქვეყანაში წარმოებული პროდუქციისა და მომსახურების კონკურენტუნარიანობის ზრდა, რისთვისაც უნდა მოხდეს ტექნიკური რეგულირების სფეროს განვითარება საერთაშორისოდ აღიარებულ ნორმებთან დაახლოების კუთხით.
2011-2014 წლების განმავლობაში ეკონომიკისა და მდგრადი განვითარების სამინისტროს უცხოური ინვესტიციების მოსაზიდად, ტურიზმის, ხარისხის ინფრასტრუქტურისა და საგარეო ვაჭრობის განვითარებებისათვის დაგეგმილი აქვს, საერთაშორისო გამოფენებში მონაწილეობა; ფესტივალების და დღესასწაულების ორგანიზება; გამოფენების მოწყობა საქართველოს ტერიტორიაზე; საქართველოს ტურისტული შესაძლებლობების პოპულარიზაცია პრესით და ტელევიზიით; ახალი ტურისტული პროდუქტის შექმნა და მათი განვითარებისათვის პროექტების განხორციელება; უცხოური და ადგილობრივი მედიის წარმომადგენლებისათვის პრეს-ტურების მოწყობა; საერთაშორისო სტანდარტების ხელმისაწვდომობის უზრუნველყოფის მიზნით თანამშრომლობა (გაწევრიანება) შესაბამის საერთაშორისო ორგანიზაციებთან; სტანდარტების რეესტრის მონაცემთა ბაზის სრულყოფა, გამზომი საშუალების დამოწმების აღიარება და აკრედიტაციის სამუშაოების განხორციელება;
მთავრობაში ფიქრობენ, რომ გასული პერიოდის გლობალური უარყოფითი ეკონომიკური მოვლენების გათვალისწინებით, ქვეყნის ერთ-ერთი ძირითადი პრიორიტეტის, ეკონომიკის განვითარებისა და ზრდის მისაღწევად აუცილებელია ზრდის ტემპის მატების უზრუნველმყოფი ეკონომიკური პოლიტიკის გატარება, რომელშიც იგულისხმება თანმიმდევრული ნაბიჯების გადადგმა ეკონომიკის შემდგომი ლიბერალიზაციის მიზნით, რაც წარმოადგენს ინვესტიციების მოზიდვის საფუძველს.
მთავრობის 2011-2014 წლების ქვეყნის ძირითადი მონაცემებისა და მიმართულებების დოკუმენტში აღნიშნულია, რომ საქართველოს ეკონომიკური განვითარების ხელშეწყობისათვის აუცილებელია: ეკონომიკური პროცესების ანალიზი, სექტორული კვლევა ქვეყნის ეკონომიკის ძლიერი და სუსტი მხარეების გამოსავლენად; შესაბამისი ღონისძიებების გატარებისთვის რეკომენდაციების შემუშავება; მაკროეკონომიკური სტატისტიკური მონაცემების ანალიზი და შესაბამისი ანგარიშების მომზადება; სამშენებლო სფეროს შემდგომი ლიბერალიზაციის მიზნით შესაბამისი (მათ შორის საკანონმდებლო) ცვლილებების განხორციელება;