მთავრობის პროგნოზით, 2011-2014 წლებში, ნაერთ ბიუჯეტში მობილიზებული თანხების მოცულობას ზრდის ტენდენცია ექნება.
ფინანსთა სამინისტროს ინფორმაციით, 2011 წლისთვის ნაერთი ბიუჯეტის შემოსავლების საპროგნოზო მაჩვენებლების მშპ-თან ფარდობის მაჩვენებელი 27.6 პროცენტს მიაღწევს, ხოლო გადასახადების წილი მთლიანი შიდა პროდუქტის მიმართ 24.1 პროცენტს გაუტოლდება.
საქართველოს მთავრობის 2011-2014 წლების ქვეყნის ძირითადი მონაცემებისა და მიმართულებების დოკუმენტის საბოლოო ვარიანტში აღნიშნულია, რომ 2011 წელს მშპ-სთან გადასახადების საპროგნოზო მაჩვენებლების ზრდა გამოწვეულია იმ გარემოებით, რომ გადასახადების პროგნოზირებისას გათვალისწინებულ იქნა საგადასახადო კოდექსის ახალი რედაქცია.
მთავრობის პროგნოზით, 2011 წელს ნაერთი ბიუჯეტის სხვა შემოსავლების წილი მთლიანი შიდა პროდუქტის მიმართ სავარაუდოდ 1.9 პროცენტს გაუტოლდება. ხოლო 2011 წელს ნაერთი ბიუჯეტის არაფინანსური და ფინანსური აქტივების რეალიზაციიდან მისაღები თანხების მოცულობა მშპ-თან მიმართებაში შესაბამისად 0.9 და 0.2 პროცენტამდეა ნავარაუდევი.