აჭარის მთავრობის თავმჯდომარემ და რეგიონის ფინანსთა და ეკონომიკის მინისტრმა ხელვაჩაურში მდებარე საწარმოები მოინახულეს. ლევან ვარშალომიძე საწარმოების მდგომარეობით, პროდუქციის ხარისხითა და გასაღების ბაზრებით დაინტერესდა.
პირველად აჭარის მთავრობის თავმჯდომარე "ჯეოდეკორს" ეწვივია. ქარხანა ჯერ კიდევ მშენებლობის და მანქანა-დანადგარებით აღჭურვის პროცესში იმყოფება, თუმცა სამი საამქრო უკვე იანვარში ამუშავდა და პროდუქციის წარმოებაც დაიწყო.
"მართლაც შთამბეჭდავი და ძალიან დიდი ქარხანაა, იმედია მოლოდინს გაამართლებთ და პროდუქციასაც ხარისხიანს გამოუშვებთ. რაც შეგვეხება ჩვენ, ხელისუფლების წარმომადგენლებს, ყოველმხრივ მხარს დაგიჭერთ და შევეცდებით ყველა პრობლემატური საკითხი, თუკი რაიმე წამოიჭრა თქვენს წინაშე, დაუყოვნებლივ მოგიგვაროთ", - აღნიშნა საწარმოს ხელმძღვანელებთან საუბრის დროს ლევან ვარშალომიძემ.
დღესვე აჭარის პირველმა პირმა შპს "ბათუმი სახლმშენებელი კომბინატი" მოინახულა კომბინატი ძირითადად, სხვადასხვა ფორმისა და ზომის რკინა -ბეტონის კონსტრუქციებს აწარმოებს სანიაღვრე არხებისთვის, ასევე მათ სახურავებს. შპს "ბათუმი სახლმშენებელი კომბინატის" წლიური კაპიტალბრუნვა მილიონნახევარ ლარს შეადგენს.
მესამე საწარმო რომელიც ლევან ვარშალომიძემ ვაჟა ბოლქვაძესთან ერთად დაათავლიერა ავეჯის საწარმო "ზობაბა" იყო. საწარმოში სხვადასხვა სახის რბილ ავეჯს აწარმოებენ. საწარმოში პირველ ეტაპზე 15 ადამიანია დასაქმებული.
