ხუროშვილის განმარტებით, ტრანსპორტის სფეროში მიმდინარე რეფორმა ორ ეტაპად ხორციელდება. დარგში საკადრო ცვლილებები უკვე განხორციელდა და ახალმა გუნდმა საკუთარი ხედვები სფეროს შემდგომ განვითარებაზე და რეგულაციებზე უკვე წარმოადგინა.

რეფორმის თანახმად, ერთიანი სატრანსპორტო ადმინისტრაცია სამოქალაქო, საზღვაო და სახმელეთო სააგენტოებად დაიშლება. სწორედ ეს უწყებები მოახდენენ შემდგომ სატრანსპორტო საშუალებების რეგისტრაციასაც.

"სარეგისტრაციო მოსაკრებლის შესახებ" კანონში შესატანი ცვლილებების თანახმად, საზღვაო ტრანსპორტის სააგენტო საქართველოს დროშის ქვეშ მცურავი გემის რეგისტრაციას (ყოველწლიური მოსაკრებელი) 80 დოლარად განახორციელებს, რასაც ემატება გემის ტევადობის მიხედვით გადასახადი და გადასახადი ტევადობიდან გამომდინარე 0,7 დოლარიდან 225 დოლარამდე მერყეობს.

იახტებისა და კატარღების შემთხვევაში გადასახადი 500 დოლარია.

კანონმდებლობის თანახმად, სამოქალაქო ავიაციის სააგენტო განახორციელებს სამოქალაქო ავიაციის საჰაერო ხომალდის რეგისტრაციას. ზემსუბუქი საჰაერო ხომალდის (750 კგ-მდე ასაფრენი მასით) და ვერტმფრენის რეგისტრაცია 500 ლარი ეღირება.

მსუბუქი საჰაერო ხომალდის (770 კგ-დან 5700 კგ-მდე ასაფრენი მასით) რეგისტრაცია 1000 ლარი.

მძიმე საჰაერო ხომალდის (5700 კგ-ზე მეტი ასაფრენი მასით) რეგისტრაცია 1500 ლარი. იმავდროულად საჰაერო ხომალდის (ვერტმფრენის) რეგისტრაციის შემდეგ მასზე ყოველწიურად საჰაერო ხომალდის საფრენად ვარგისიანობის გაცემის მოწმობის საფასური 500 ლარი იქნება.
უკვე ცნობილია, რომ საერთაშორისო საავტომობილო სამგზავრო გადაყვანასა და საერთაშორისო სატვირთო გადაზიდვაზე მრავალჯერადი ნებართვები კონკურსის წესით გაიცემა. აღნიშნულთან დაკავშირებით ცვლილება შედის "ლიცენზიებისა და ნებართვების შესახებ" კანონში.