ფეხბურთის ფედერაციამ ნოდარ ახალკაცის პრეზიდენტობის პერიოდში 55 მლნ 924 ათასი ლარი დახარჯა, ხოლო 9 მლნ 84 ათასი ვალი დაედო. ამის შესახებ დღეს ფეხბურთის ფედერაციის აღმასრულებელი კომისიის სხდომის დასრულების შემდეგ ზვიად სიჭინავამ განაცხადა. მისი თქმით, "ჯორჯიან კონსალტინგის" მიერ გამოქვეყნებული აუდიტის დასკვნის გადამოწმებაც მოხდება.
"კომისიამ მიიჩნია, რომ ზოგ საკითხებში დასკვნა არაკონკრეტულია, ამიტომ კომპანია "ჯორჯიან კონსალტინგი" თავიდან წარადგენს აუდიტს, რომელსაც დაახლოებით ერთი კვირის ვადაში განვიხილავთ", - აღნიშნა სიჭინავამ.
ფეხბურთის ფედერაციის დღევანდელმა პრეზიდენტმა დაამატა, რომ სანამ აუდიტის ხელმეორე შედეგები არ გახდება ცნობილი, არავის პასუხისმგებლობის საკითხი არ დადგება.
"ვიდრე ყველაფერი არ გახდება ცნობილი, გადაჭრით ვერაფერს ვიტყვით, რაც შეეხება თანხებს რომლებიც კომისიამ დღეს წარადგინა, ზუსტია და აღარ შეიცვლება, საუბარია 2005 წლიდან დღემდე სფფ-ის მიერ დახარჯულ 55 მლნ 924 ათას ლარსა და დავალიანებაზე, რომელიც 9 მლნ 84 ათას ლარს შეადგენს", - განაცხადა სიჭინავამ.
დღევანდელ სხდომაზე ფეხბურთში ნარკომანიის პრობლემაზედაც ისაუბრეს. თბილისის საპატრულო პოლიციის უფროსმა, ფედერაციის აღმასრულებელმა წევრმა, გიორგი გეგეჭკორმა კიდევ ერთხელ აღნიშნა, რომ ფეხბურთში ეს პრობლემა მართლაც არსებობს. მან მაგალითად საქართველოს ეროვნული ნაკრების ორი ფეხბურთელი მოიყვანა, რომელთაც ამ მხრივ პოლიციასთან პრობლემები უკვე ჰქონდათ, თუმცა კონკრეტული გვარების დასახელებისგან თავი შეიკავა.
