აშშ-ის სპეციალური წარმომადგენელი უკრაინის საკითხებში, კიტ კელოგი, რუსული დრონების პოლონეთის ტერიტორიაზე თავდასხმას შემთხვევითობად არ მიიჩნევს და ასევე ირწმუნება, რომ უკრაინა ომს არ წააგებს.
კელოგმა ამის შესახებ იალტის ევროპული სტრატეგიის (YES) 21-ე ყოველწლიურ შეხვედრაზე განაცხადა.
„19 დრონი შეფრინდა - ეს არ შეიძლება შემთხვევით მომხდარიყო. შეიძლება ერთი არასწორი სამიზნე ყოფილიყო, შეიძლება ორი, მაგრამ არა 19,“ - განაცხადა კელოგმა.
კელოგის თქმით, ვლადიმირ პუტინი „მიზანმიმართულად მოქმედებს, ის სიგნალს აგზავნის და სურს მოისმინოს პასუხი, შეუძლია თუ არა მას (თავისი შესაძლებლობების) ზღვრის კიდევ უფრო გაზრდა“.
„თქვენ ეს ფილმი უკვე ნახეთ ევროპაში. გახსოვთ, როდესაც ჩემბერლენმა თქვა, რომ მან ევროპაში მშვიდობა მოიტანა და რა მოხდა შემდეგ“, - თქვა გენერალმა და მიანისნა ევროპის მიერ ჰიტლერთან კომპრომისზე დათანხმებაზე.
„თუ ისტორიის გაკვეთილებს არ გავითვალისიწნებთ, მესამე მსოფლიო ომისკენ წავალთ“, - თქვა კელოგმა.
ის ასევე დარწმუნებულია, რომ რუსეთი უკრაინის წინააღმდეგ ომს ვეღარ მოიგებს.
„უკრაინა ამ ომს არ წააგებს. უკრაინელებს რუსეთთან შედარებით მორალური უპირატესობა აქვთ, ეს აშკარაა“, - თქვა კელოგმა.
მან ასევე აღნიშნა, რომ „უკრაინელები დრონების წარმოებაში მსოფლიო ლიდერები გახდნენ“,
მნიშვნელოვნად გაუსწრეს შეერთებულ შტატებს.
ამავდროულად, მისი თქმით, მიუხედავად იმისა, რომ რუსეთს „ძლიერი არმია ჰყავს, ის ისეთი ძლიერი არ არის, როგორც თავად რუსები ირწმუნებიან“.
„უკრაინელებმა უკვე მოახერხეს რუსეთის ფედერაციის სამხედრო ძალის მნიშვნელოვნად შემცირება, ამიტომ უკრაინის დამარცხებაზე საუბარი აღარ არის“, - განაცხადა კელოგმა.
კელოგმა ასევე განაცხადა, რომ ჩინეთის მიერ რუსეთის მხარდაჭერის სრული შეწყვეტა უკრაინის წინააღმდეგ რუსეთის აგრესიის ძალიან სწრაფ დასრულებას გამოიწვევს.
„რუსეთი ახლა ჩინეთის უმცროსი პარტნიორი გახდა. ახლა შეგვიძლია ვთქვათ, რომ ჩინეთს ეკონომიკური უპირატესობა აქვს რუსეთთან შედარებით, ასევე სამხედრო ძალით და ისტორიულადაც კი.
მეტსაც ვიტყვი - თუ ჩინეთი მთლიანად შეწყვეტს რუსეთისთვის დახმარებას, ეს ომი ხვალ დასრულდება“, - ამბობს კელოგი.
12 სექტემბერს აშშ-ის პრეზიდენტმა დონალდ ტრამპმა განაცხადა, რომ რუსული დრონები პოლონეთის საჰაერო სივრცეში შესაძლოა „შეცდომით“ შეიჭრნენ.
