"დაიცავი საქართველოს" ლიდერის დავით მაღრაძის თქმით, მოძრაობის პროექტი_"ახალი ქართული კონსერვატიზმი" თანამედროვე ქართულ მენტალურ სივრცეში საერთო ნიადაგის მოსინჯვის გზაა.
როგორც "ჯი-ეიჩ-ენთან" საუბრისას დავით მაღრაძემ აღნიშნა, ახალ ეროვნულ პროექტზე მუშაობა ბევრი რამის გამო გადაწყდა. მათ შორის, ერთ-ერთია ფსევდო-ლიბერალური მოდერნიზაციის პროცესის კრახით დასრულება.
"ფსევდოლიბერალური მოდერნიზაციის პროცესი კრახით სრულდება, თუ დასრულდა. ამიტომ ჩვენს მოსახლეობას ვთავაზობთ ახალ ნაციონალურ პროექტს, რომელსაც პირობითად ახალი ქართული კონსერვატიზმი დავარქვით. იგი ეფუძნება ანტიკურ სიბრძნეს, ქრისტიანულ ზნეობას, კლასიკურ განათლებასა და თავისუფალ პიროვნებას. ეს გახლავთ უფლებამოვალეობების ჰარმონიზება მოვალეობების პრიმატით, თაობათა კონფლიქტის შეწყვეტა და ჰარმონიული გზით სიარული",_აღნიშნა დავით მაღრაძემ.
მისი თქმით, ამ პროექტზე მუშაობა კარგა ხანს გრძელდებოდა. "საბოლოო ჭეშმარიტების ამბიციით დასნეულებულნი არ ვართ, მაგრამ ვფიქრობთ, რომ პროექტი საზოგადოების განსჯის საგნად იქცევა".
ცნობისთვის, "დაიცავი საქართველოს" წევრებმა პროექტი პირველად "ქართულ აკადემიას" წარუდგინეს. მოგვიანებით ახალ ნაციონალურ პროექტს სასწავლებლებს, კულტურის კერებს, არასამთავრობო ორგანიზაციებს, საბოლოოდ კი_პოლიტიკურ პარტიებს გააცნობენ.
