„ქრისტიან-დემოკრატების" ლიდერები რეგიონებში სტუმრობას განაგრძობენ. გიორგი ახვლედიანი და ლევან ვეფხვაძე დღეს გურჯაანის რაიონში ჩავიდნენ და სოფელ ჩუმლაყის მოსახლეობას შეხვდნენ. შეხვედრაზე რამდენიმე პრობლემა გამოიკვეთა. ლევან ვეფხვაძის განცხადებით, ბევრი სხვა სოფლის მსგავსად, ჩუმლაყშიც სოფლის მეურნეობის მიმართულებით სრული კოლაფსია.
„ხალხი უჩივის დიზელის საწვავის სიძვირეს, ტრაქტორების, გვარჯილას და შხამ-ქიმიკატების არარსებობას. ვისაუბრეთ სიმინდის ჰიბრიდული ჯიშების დათესვის მიზანშეწონილობაზე. გლეხები ამბობენ, რომ ვინც შარშან დათესა, უკმაყოფილო დარჩა, რადგან ხარჯი იზრდება, მოსავალი კი თითქმის იგივეა. ჰიბრიდული ჯიშის 1 კილოგრამი სათესლე მასალა 18 ლარი ღირს, რაც ერთ ჰექტარზე 300 ლარით აძვირებს ხარჯს, ეს კი გაჭირვებული მოსახლეობისთვის დიდი ფუფუნებაა" -აცხადებს ვეფხვაძე.
გიორგი ახვლედიანის თქმით, სოფლებში დღეს მთავარი პრობლემა დაუმუშავებელი მიწებია, ამის მიზეზი კი ისაა, რომ პროდუქციის მოყვანა არარენტაბელური გახდა.
„სხვადასხვა რეგიონის სოფლებში ჩვენი ხშირი ჩასვლა პრობლემების ადგილზე გაცნობის სურვილმა განაპირობა. ყველა ამ ინფორმაციას აუცილებლად მოვახსენებთ პრეზიდენტ სააკაშვილს, როცა ის პარლამენტში ანგარიშის ჩასაბარებლად მოვა. ჩვენ არ დავუშვებთ ხალხმა კვლავ ტყუილები ისმინოს იმის შესახებ, როგორ ზრუნავს ხელისუფლება ქართულ სოფელზე" - აცხადებს გიორგი ახვლედიანი.
